İranda oppoziśiyä liderları irekkä çığaçaqmı?

İran parlamentı räise urınbasarı Ali Mutaxxari oppoziśiyä liderları Mäxdi Kärrubi, Mir Xösäyen Musävi häm xatını Zöhrä Raxnävärdne irekkä çığarırğa kiräklegen belderde. Alar 2011nçe yıldan birle öy sağında totıla. Ali Mutaxxari bu xaqta parlamentnıñ açıq utırışında söyläde. Ul: “Oppoziśiyä liderların mäxkämä qararı bulmağan kileş öy sağında totu konstituśiyägä qarşı kilä,”-dide. Anıñ fikerençä, älege şäxeslärneñ irekkä çığuı İrandağı milli berlek häm bergälek fikerenä öleş kertäçäk.  

Mäxdi Kärrubi, Mir Xösäyen Musävi häm Zöhrä Raxnävärd 2009nçı yılnıñ 12nçe iyünendäge ilbaşı saylawlarınnan soñ, näticälärgä rizasızlıq kürsätte häm protest çaralarına teläktäşlek belderde. Şul säbäple alarnı öy sağına yaptırdılar. İldäge aldınğı qaraşlı keşelär älege şäxeslärneñ 2011nçe yıldan birle bernindi xökem qararsız ireksez totılularınıñ qanunsızlıq buluın belderä.

Süz uñayınnan, 2013nçe yılda ilneñ başına kilgän Xäsän Ruxaninıñ saylaw aldı wäğ’dälärennän berse - öy sağın beterü ide.