Greśiyädäge urman yanğını

Greśiyädäge urman yanğınnarında 60tan artıq keşeneñ ğomere özelgän, 172 keşe yaralanğan. 11eneñ xäle ayıruça awır. Ülüçelärneñ qayberläre yanğın waqıtında öylärennän häm maşinalarınnan çığa almıyça, ikençeläre uttan qaçıp diñgezgä kergännän soñ batıp, ülde. Yaralanuçılarnıñ 16sı bala. Yuğaluçılarnıñ qayberläre äle xaman tabılmadı, alarnıñ ülgän buluınnan şöbhälänälär.   

Könçığış Attikadağı yanğın gektarlarça urmannı, xisapsız yort häm maşinanı kölgä äyländerde. Töbäktä ğadättän tış xäl iğ’lan itelde.

Ut urmanlı cirlektä çıqsa da, bik köçle häm härdaim yünäleş üzgärtkän cil säbäple, tiz arada Pändäli, Mati, Rafina, Vuças şikelle toraq punktlarına da barıp citte. Yanğın süzderüçelär keşelärneñ öylärennän kitüen taläp itte. Qotılu öçen diñgez qırıyına kilgän yözlärçä keşegä yärdämgä xärbi, grajdanlı häm şäxsi köymälär aşıqtı. Töne buyı xalıqnı Rafina portına taşıdılar.

Yortsız qalğan keşelär waqıtlıça yäşäw öçen Qunaqxanäçelär berlege tarafınnan bülmälär belän täêmin itelde. Şulay uq, xärbi ob’yektlarda da urın tabıldı.

Bosniya-Gerśegovinada bulğan xökümät räise Aleksis Śipras säfären taşlap aşığıç räweştä başqala Afinağa qayttı. Ul ğadättän tış xäl cıyılışında ministrlar, türälär häm yangın sünderü idaräse wäkillärennän qısqaça mäğ’lümat aldı. Soñınnan belderü yasap, utnı sünderü öçen barlıq aşığıç yärdäm komandalarınıñ çaqırıluın äytte. “Attikanıñ könçığışında da, könbatışında da ber ük waqıtta çıqqan yanğınnar şöbhä tudıra,”-dide Śipras.

 Xökümät süzçese Dimitris Kanakopulos isä, töbäktä ber ük waqıtta 15 ayırım cirdä yanğın çığuın, köçle cilneñ isä anı tiz arada kontrol’sez xälgä kiterüen söyläde.

İldä 24 säğat’tä 47 noqtada yanğın çıqtı.  

Qazağa qarşı cirdän 300gä yaqın yanğın sünderüçe, 100dän artıq texnika, cäyäwle berleklär häm ixtıyari yärdämçelär qarşılıq kürsätä. Hawadan isä 7 maxsus oçqıç häm 10 boralaq belän sünderergä mataşalar. Dimitris Kanakopulos Awrupa grajdanlıq saqlanudan da yärdäm sorawların belderde. İspaniya, Germaniya, İtaliya häm Franśiya şikelle bik küp illärdän yanğın sünderü oçqıçları häm komandaları cibärelde.  

Bu qotoçqıç hälakät säbäple parlament binasında bayraqlar yartılaş asqa töşerelde. İl däwamında 3 könlek matäm iğ’lan itelde.