Bosniya-Gerśegovinada tağın ber kümäk qaberlek tabıldı

Bosniya-Gerśegovinada 1992nçe-1995nçe yıllar arasında bulğan suğışta üterelgän bosniyälelärneñ tağın ber kümäk qaberlege tabıldı. Bu xaqta Bosniya-Gerśegovina yuğalğan keşelär institutınıñ matbuğat süzçese Lejla Cengic belderde. Qaberlek Drvar şähäre yanındağı Golubjnaca çoqırında urın alğan. Anı tapqannan soñ qazu êşläre başlana. Näticädä 8 keşeneñ cäsäd qaldıqların çığaralar. “Tabılğan skeletlar tulı tügel. Bu barı tik söyäk öleşläre. Qazunı däwam itteräbez,”-di Cengic. Ul cäsäd qaldıqlarınıñ 64 metr tiränlektä buluın söyläde. Tağın ber keşeneñ skeletına barıp citkännär. Ämma yanında minalar bulu säbäple, anı çığarmağannar. Urınğa minadan çistartu törkeme kiläçäk, şunnan soñ skeletnı alu mömkin bulaçaq.  

Yaña tabılğan kümäk qaberlektän 800 metr yıraqlıqta ğına 2001nçe yıldağı qazular waqıtında 19 qorbannıñ söyäklären tapqan bulğannar. Cengic beldergänçä, töbäktä êzläw êşläre däwam itäçäk.

Yaña kümäk qaberlektäge cäsädlärneñ suğışta üterelgän ğadi bosniyäle keşelärneke buluın farazlıylar.