Angliyädä qabat “Noviçok” waqıyğası

Angliyädä qabat “Noviçok” ximik matdäse belän bäyle waqıyğa. Êymsberi şähärçegendä yäşäwçe ber par uzğan şimbädä – 30nçı iyün’dä -  öylärendä añsız xäldä tabıldı. Poliśiyä alarnıñ nerv sistemasına täêsir itüçe ximik matdä belän ağulanuın belderde. Xatın-qız – 45, ir-at 46 yäşendä, ikese dä Angliya watandaşı. Zıyan kürüçelärneñ şäxese xaqında başqa mäğ’lümat birelmi.  Bu ike keşedän ürnäklär alınıp, Porton Daun saqlanu fäne häm texnologiyäse laboratoriyäsenä cibärelde. Anda açıqlanğança, Êymsberi şähärçegendä yäşäwçe par, êlekkege rus şımçısı Sergey Skripal’ häm qızı şikelle ük, “Noviçok” matdäse täêsirendä qalğan.

Tikşerenüne terrorçılıq belän köräş bülege alıp bara. Oyışmanıñ il buyınça koordinatorı Nil Basu beldergänçä, ağulanğan par Solsberi şähäre xastaxanäsendä. Alarnıñ xäle bik awır.

Şunısın da äytergä kiräk, älege par yäşägän Êymsberi şähärçege Sergey Skripal’ belän qızı ağulanğan Solsberidan 12 km yıraqlıqta ğına. Alar da 14nçe martta ber êskämiyädä añsız xäldä tabılğan ide. Äti belän qız ayaqqa basıp xastaxanädän çıqtı, alarnıñ däwalanuı öylärendä däwam itä.  

Angliyä Skripal’lärneñ ağulanuında Rusiyäne ğayepläde. Çönki älege matdä 1970nçe häm 1980nçe yıllarda Sovetlar berlegendä çığarıldı.