Därada “utnı tuqtatu” söyläşüläre

Süriyäneñ Dära rayonında utnı tuqtatunı täêmin itü öçen cıyılğan Rusiyä häm xärbi oppoziśiya delegaśiyäläreneñ söyläşüe näticäsez buldı. Oçraşu Busra äş-Şam ilçäsendäge ber xärbi noqtada ütte. Alar Därada bäreleşlärne tuqtatunıñ şartların qaradılar. Cirle xärbi oppoziśiyäneñ Üzäk xäräkät ştab-fatirı süzçese İbrahim Cäbbavi beldergänçä, ruslar täq’dim itkän şartlar mısqıllaw şikelle bulğan. Şunnan soñ oppoziśiyä cıyılışnı taşlap çığıp kitkän. Süzçe rus delegaśiyäseneñ qabul itelmäyäçäk şartlar quyuın söyli. “Cıyılışta Süriyäneñ kön’yağın tulısınça Äsäd rejimına qaldırıp kitüebezne telädelär. Bäysez Süriyä armiyäse qulındağı barlıq awır häm ciñel qorallarnı tapşırırğa tiyeş bulabız. Şunnan soñ kileşü prośessı başlanacağın belderdelär. Monnan tış, rejimnıñ “qara” isemlegendä buluçılarnı mäxkämä qarşına çığaru şartı quyıldı,”-di İbrahim Cäbbavi.

Söyläşülär barğan arada rejim köçläre Däranıñ könçığış qırlarındağı toraq punktlarğa bombalı höcüm yasadı. Anda 7 keşeneñ ğomere özelde. Bu xaqta “Aq beretlar” grajdannar qotqaru törkeme xäbär itä.

Şulay itep, rejim köçläre häm Rusiyäneñ hawadan yärdäme belän 20 iyün’nän birle baruçı xärbi operaśiyädä ğadi xalıqtan kimendä 104 keşe ülde. Şulay uq, 150läbe Yordaniya häm İzrail’ çiklärenä küçep kitte. Yordaniya çigenä kilgän yaralı sıyınuçılarğa tabib yärdäme kürsätelä. Xökümät süzçese Cumana Ganimat beldergänçä, küçenüçelär Yordaniyağa kermägän, alarnı çik buyındağı xärbi berençe yärdäm maşinalarında däwalıylar.