Prinś Uil’yamnıñ İzrail’gä säfäre

Angliyaneñ patşa ğailäsennän İzrail’gä täwge räsmi zıyärätne täxetneñ ikençe çirattağı varisı prinś Uil’yam yasadı. Kembridj gerśogı Tel’-Avivta İzrail’ ilbaşı Reuven Rivlin häm xökümät räise Bin’yamin Netan’yaxu belän oçraştı.

Rivlin qunaqnı ilbaşı rezidenśiyäsendä qabul itte. Ul prinś Uil’yam aşa Fälästin däwlät başlığı Mäxmüt Abbasqa solıx çaqıruın citkerergä teläwen belderde. Täxet varisı da: “Tınıçlıq urnaşır dip ömetlänäm,”-dide.   

Söyläşüdän soñ prinś Uil’yam İzrail’ ilbaşına êlekkege ingliz futbolçısı Steven Djerrardnıñ imzası bulğan Liverpul’ komandası formasın büläk itte.

Netan’yaxu belän oçraşu ministrlar kabinetında ütte. Prem’yer prinśnı xatını Sara Netan’yaxu belän bergä işek töbendä qarşıladı. Söyläşülär xaqında başqa belderü yasalmadı.    

Prinś Uil’yam bügen irtän Könbatış Qudüstä 2nçe Bötendön’ya suğışında ülgän yähüdlärneñ istälegenä quyılğan “Yad Vaşemi”nı (Genośid muzeyı) ziyarät itte. İrtägä isä ul basıp alınğan Ramallax şähärendä Fälästin däwlät başlığı Mäxmüt Abbas belän oçraşaçaq.