BMOnıñ Fälästin xalqın yaqlawnı taläp itüçe qararı

AQŞ tarafınnan İminlek şurasında veto quyılğan proyıkt qabat urrtağa çığarıldı

BMOnıñ Fälästin xalqın yaqlawnı taläp itüçe qararı

BMO ğomum assambleyasında Fälästin xalqın yaqlawnı taläp itüçe qarar proyıktı qabul itelde. Törkiyäneñ aktiv êşçänlegennän soñ, Aljirnıñ da yärdäme belän, Fälästin dokumentı xaqında söyläşü öçen oyışmanıñ yuğarı dairäläre maxsus utırışqa cıyıldı.  Anda AQŞ tarafınnan İminlek şurasında veto quyılğan proyıkt qabat urrtağa çığarıldı. Cıyılıştağılar Fälästin xalqı öçen yaqlaw taläp itüçe qararnı tawış birü yulı belän qabul itte. Proyıkt 120 uñay cawap aldı. 8 däwlät qarşı çıqtı. 45 il isä tarafsız qaldı. Qararğa qarşı çığuçı däwlätlär: AQŞ, İzrail’, Avstraliya, Marşall utrawları, Nauru, Togo, Solomon utrawları, Mikroneziya federativ ştatları.  

Amerika Quşma Ştatları proyıktqa Xamasqa qarşı ber üzgäreş kertergä telägän ide – anı kire qaqtılar.

Fälästin däwlät başlığı Mäxmüt Abbas bu dokumentnıñ qabul itelüen “Ğadellek häm xalıqara xoquqta ber ciñü” dip bäyäläde.

Qararda äytelgänçä, BMO ğomum särqatibe 60 kön êçendä Fälästin xalqınıñ iminlege öçen kiräkle bulğan çaralar turında xisap xäzerlärgä tiyeş. Anda, şulay uq, İzrail’neñ çamasız köç qullanuın tuqtatuı häm Ğazzädäge qamalışnı beterüe taläp itelä. Fälästindä 30nçı marttan başlap artqan räximsez waqıyğalar da iskä alına. Balalar, mediśina xezmätkärläre häm jurnalistlarnıñ da İzrail’ räximsezlegenä duçar buluı assızıqlana.

Gomum assambleya qararlarınıñ yuridik köçe yuq, ämma ul däwlätlärneñ fikeren çağıldıra.  

Keşe xoquqların küzätü oyışması da İzrail’gä citdi kisätü yasadı. Ul Ğazzädäge rizasızlıq kürsätüçelärneñ ülemenä kitergän çamasız köç qullanunıñ suğış cinayät’läre bularaq qaralırğa mömkinlegen assızıqladı.  



Bäyläneşle xäbärlär