Singapur dön'yanıñ iñ yıraq oçışın tormışqa aşıra

Singapur hawa yulları 11nçe oktyabr’dä dön’yanıñ iñ ozın oçışın tormışqa aşıraçağın belderde. Anıñ 19 säğat’ däwam itäçägen farazlıylar.  Oçqıç Singapurdan hawağa kütäreläçäk häm AQŞnıñ N’yu York şähärenä töşep utıraçaq. Marşrutnıñ ozınlığı yaqınça 16 meñ 700 kilometr. Bu oçış Katar hawa yullarınıñ Doxadan Oklendqa yasağan 14 meñ 500 kilometrlıq rekordın uzaçaq. Oçqıçta 67 bizness häm 94 êkonomik sıynıf urınnarı bulaçaq. Anıñ atnada 3 säfär yasawı kötelä.

Singapur hawa yulları Singapur – Newark arasındağı ozın oçışnı, Airbuslarnıñ yağulıqları qıymmätkä töşü säbäple, 2013nçe yılda ğamäldän çığarğan ide. Şunnan soñ N’yu Yorkka oçışlarnı Frankfurt aşa yasıy başladı.  

Bu yulı Singapur hawa yulları A350 model oçqıçnıñ bik yıraq aralarğa oça aluçı versiyäsen qullanaçaq. Alarda tüşämnär biyek, täräzälär tağın da zur, korpusu êkstra kiñ häm gäwdä ritmı bozılunı kimetä torğan şäkeldä yaqtırtılğan.  

Singapur hawa yulları bu tör oçqıç belän Singapurdan Los Anjelesqa da şundıy uq özleksez oçışlar kertergä isäpli.

Monnan tış, Avstraliya milli hawa yulları da 2022nçe yılda Londonğa tuqtalışsız oçu öçen bu oçqıçnı satıp alırğa uylıy.