Tramp Kim belän oçraşudan baş tarttı

AQŞ ilbaşı Donal’d Tramp Tön’yaq Koreya liderı Kim Çjen İn belän 12nçe iyün’dä Singapurda bulaçaq oçraşunı ğamäldän çığardı. Ul bu xaqta Tön’yaq Koreyadağı xezmättäşenä xat yazıp cibärde. Aq Yort bu xatnıñ êçtälege belän urtaqlaştı.

Tramp oçraşudan baş tartuınıñ säbäbe itep Kim Çjen İnnıñ soñğı çığışlarında “zur açu häm açıqtan-açıq doşmanlıq” sizüen kürsätä. Ul küptännän planlaştırılğan oçraşunı xäzerge waqıtta yasawnıñ xäyerle bulmawın belderä.

Tramp xatında: “Atom-töş quätegez turında söylisez, ämma beznekelär şulqadär zur häm köçle ki, anı qullanırğa yazmasın dip doğa qılam,”-di. Ul, şulay uq, dön’yanıñ, ayıruça, Tön’yaq Koreyanıñ ähämiyätle forsatnı quldan ıçqındıruın belderä. Tramp azat itelgän 3 amerikalı mäxküm öçen räxmät äytergä dä onıtmıy. “Ägär fikereñne üzgärtsän, miña şaltıratırğa yäki yazarğa uñaysızlanma,”-di ul Tön’yaq Koreya liderına.

AQŞ ilbaşı Trampnıñ Kim belän sammitnı kiçekterü qararı Tön’yaq Koreyanıñ atom-töş sınaw poligonın çit il jurnalistları küz aldında yuqqa çığaru süzen ütägän könne alındı.