Yämändä xusilär höcüme

Yämänneñ könçığışındağı Marib rayonında xusilärneñ bombalı höcümendä 5 keşeneñ ğomere özelde, 20se yaralandı. Wäqalätle zatlar bu sannarnıñ tağın da artuınnan qurqa. Cirle iminlek xezmätkärläre beldergänçä, xusi suğışçıları tarafınnan atılğan katyuşa raketası xalıq küp bulğan mäxällägä töşkän.

Xusilär Maribnıñ könbatışındağı Häyälan tawın kontrol’dä tota. Qorallı suğışçılar annan yış qına toraq punktlarga häm xärbi alannarğa höcümnär yasıy.  

Yämändä inde küptännän säyäsi totrıqsızlıq xökem sörä. Xusilär ilneñ idaräsen qulğa töşerergä teli. Alar 2014nçe yıldan başlap başqala Sana häm qayber töbäklärne kontrol’lärendä tota. Soğud Ğaräbstanı citäkçelegendäge koaliśiya 2015nçe yılnıñ martınnan başlap qanunlı xakimiyät köçlärenä xusilär belän köräştä yärdäm itä.