Könçığış Gutadağı qurqınıç wäzğıyät’

Berläşkän Millätlär oyışması Süriyädä Äsäd rejimı häm yärdämçeläreneñ qamalışındağı Könçığış Gutadağı wäzğıyät’ne “qurqınıç” dip belderde.  Gumanitar êşlärne koordinaśiyäläw ofisı süzçese Yens Lêrke Jenevada jurnalistlar belän oçraştı. Ul Könçığış Gutada tınıç xalıqnı bombalaw häm qanun tışı qorallar qullanu turında xäbärlärneñ daimi kilüen assızıqlıy. Mäsälän, Äsäd rejimı sıyınu urınına napalm bombası atıp 37 keşene yandırıp ütergän.  Yens Lêrke äytkänçä, Könçığış Guta qamalıştağı töbäk häm anda kirtäsez häm bäysez kerü röxsäte yuq. Şuña kürä BMO bu mäğ’lümatlarnıñ döreslegen tikşerä almıy. Ämma alarnı yalğan dip uylarlıq säbäp tä yuq, -di süzçe. Yens Lêrke töbäktän qaçqan 10 meñnärçä keşeneñ ruxi xaläteneñ qurqınıç buluın söyli.  Monıñ östenä, yaralı, aç, susız häm yıllarça tabib yärdäme kürmägännär.

BMO Gomum särqatibe Äntonio Guterriş Süriyädä ximik qoral qullanu afät däräcäsenä kilüen häm İminlek şurasında bu mäs’äläneñ çişelergä tiyeşlegen assızıqlıy.

BMOnıñ Balalarğa yärdäm fondı süzçese Mariksi Merkado İdlibta üzläre tözegän mäktäpkä atna başında höcüm yasaluın häm 17 balanıñ ülüen belderde. Anıñ äytüençä, İdlibtä yaqınça 1 million bala artuçı dähşät êçendä yäşi. Süriyädä watandaşlar suğışı başlanğannan birle 300dän artıq belem birü yortına höcüm buldı.