BMOdan çista su probleması kisätüe

Berläşkän Millätlär Oyışması 2050 nçe yılda dönya külämendä citdi räweştä çista su probleması kilep tuaçağı xaqında kisätkän.

Su çığanaqlarınıñ iminlege mäs’äläse qaralğan BMO iminlek şurası cıyılışında Berläşkän Millätlär Oyışması räsmi zatları häm illlär wäkilläre yaqın kiläçäktä dönyada çista suğa ireşüdäge qıyınlıqlarnı küzdän kiçergän.

BMO ğomum särqätibe Antonio Guterres 2050 nçe yıldan başlap cir şarında çista su taläbeneñ 40%qa artaçağın ,dönya xalqınıñ kim digändä dürttän ber öleşenä çista suğa ireşä almaw qurqınıçı yanawın beldergän.

İminlek şurasınıñ çirattağı räislegen başqaruçı Boliviya däwlät başlığı Evo Morales ta cıyılışta yasağan çığışında 1947 nçe yıldan başlap bügenge köngä qadär illär arasında su çığanaqların büleşü belän bäyle 37 bäxäs-ğawğanıñ küzätelüen citkergän.