Angliya berlektän kitärgä äzerlänä
Tereza Mêy 29nçı martta kiräkle êşçänleklärneñ başlanacağın açıqlağan
Angliya Awrupa Berlegeneñ Lissabon kileşüeneñ 50nçe maddäsenä yaraqlı räweştä Awrupa Berlegennän kitärgä äzerlänä.
Angliya premyer-ministrı Tereza Mêy 29nçı mart könne ileneñ Awrupa Berlegennän kitüe öçen kiräkle êşçänleklärneñ başlanacağın açıqlağan.
Täraqqıyätne Angliya premyerı Mêynıñ süzçese dä döres dip citkerep, älege adımnıñ yasalaçağı belän bäyle kiräkle mäğlümatnıñ Angliyaneñ Awrupa Berlege daimi wäkile Sör Tim Berrou tarafınnan Awrupa Berlege räsmi zatlarına ireşterelüen beldergän.
Süzçe xökümätneñ Awrupa Berlege belän älege mäs’älädäge söyläşülärneñ qısqa waqıtta başlanuın teläwen dä äytkän.
Awrupa Berlegeneñ Angliyaneñ bu adımına 2 täwlek êçendä cawap birüe kötelä.
Angliyada yaqınça 9 ay êlek ütkärelgän referendumda 51,9% belän berlektän kitü yulında qarar çıqqan ide.
Bu ay azağında başlanaçaq barışnıñ yaqınça 2 yıl däwam itüe häm Angliyaneñ 2019nçı yılda Awrupa Berlegennän kitüe kötelä.
