Obama häm Putin Savçenko turında söyläşkän
AQŞ İlbaşı Obama Ukraina oçuçısı häm xalıq ışanıçlısı Nadejda Savçenkonıñ azat itelüen sorağan.
Amerika Quşma Ştatları İlbaşı Barak Obama Rusiyä Federatsiyäse Däwlät başlığı Vladimir Putinnan ilendä totqın bulğan Ukraina oçuçısı häm xalıq ışanıçlısı Nadejda Savçenkonıñ azat itelüen sorağan.
Amerika Quşma Ştatlarında “Associated Press” agentlığına söylägän isemen açıqlarğa telämäwçe yuğarı däräcäle räsmi ber zat Obamanıñ Putin belän düşämbe könne ütkärgän telefon söyläşüe waqıtında bu mäs'äläneñ dä quzğatıluın äytkän.
Putinnıñ bu teläkkä niçek itep cawap birüe isä açıqlanmağan.
Rusiyäneñ Süriyädän xärbi köçen öleşçä qaytaru qararınnan soñ Obama häm Putin telefon aşa söyläşkän häm Rusiyä Federatsiyäse belän Ukraina arasındağı problemalarğa da tuqtalıp uzğan ide.
Ukrainanıñ könçığışında Rusiyä yaqlı separatistlarğa qarşı operatsiyälärdä üzixtıyarıy bularaq qatnaşqan Ukraina ğäskäreneñ berdänber xatın-qız oçuçısı ölkän leytenant Savçenkonı 2014nçe yılnıñ 18nçe-19nçı iyün könnärendä Sçastye tiräsendä ğämäldä bulmağan Lugansk xalıq cömhüriyäte separatistları totıq itep alğan ide.
