Süriyä söyläşüläre Qazaqstanda uza
Söyläşülär 27 nçe mayda tögällänäçäk
288362
Qazaqstan başqalası Astanada Süriyä oppozitsiyäsennän wäkilleklär arası söyläşülär başlanğan.
Qazaqstan tışqı eşlar ministrlığı qaysı oppozitsiya törkemnärennän wäkillär qatnaşuı turında centekle mäğlümat birmägän , barı tik söyläşülärneñ 27 nçe mayda tögällänäçägen beldergän.
Ministrlıqtan yasalğan belderüdä Qazaqstan aradaşçılığı belän alıp barıluçı älege söyläşülärneñ süriyäle oppozitsionerlarnıñ taläbe belän oyıştırıluı assızıqlanğan.
Belderüdä Süriyädäge naçar wäzğiyätne barı tik tınıç yullar belän yaxşırtu mömkin buluı , monı da barı tik süriyälelärneñ tormışqa aşıra alaçağına basım yasalğan.
Matbuğatqa yabıq uzuçı söyläşülärdän soñ belderü yasaluı kötelä.
Berläşkän Millätlär Oyışması kürsätkeçlärenä kürä, Süriyädä 4 yıl däwam itkän watandaşlar suğışında 220 meñ keşeneñ ğomere özelgän.
