Oçqıçnıñ qara tartması tabılğan

Frantsiyaneñ Eçke eşlär ministrı Bernard Cazeneuve “Lufthansa” hawa yullarına bäyle “GermanWings” hawa yulı şirkäteneñ Frantsiyaneñ könyağında kilep töşkän Airbus A320 törendäge oçqıçnıñ qara tartmalarınnan berseneñ tabıluın beldergän.

Oçqıç töşkän urınğa kitkän Cazeneuve oçqıçta 144 yulçı belän 6 keşelek ekipajnıñ buluın citkerep, oçqıç kisäklären ezläw eşçänleklärendä 300 yanğın sünderüçe häm jandarmeriyaneñ wazifalandırıluın, eşçänleklärdä 10 boralaq häm 1 xärbi oçqıçnıñ qullanıluın äytkän.

Frantsiya däwlät başlığı François Hollande qazada ülüçelär arasında törek yulçılarınıñ da buluın citkergän ide, läkin Törkiyäneñ tışqı eşlär ministrı Mäwlüt Çavuşoğlu ber törek keşeseneñ genä yaqtı dönyadan kitüen açıqladı.

“GermanWings” şirkäte süzçese waqiğada hawa şartlarının normal buluın, oçqıçnıñ kilep töşü säbäbeneñ tikşerelüen beldergän.

Süzçe yärdämgä çaqırunıñ pilottanmı yäisä hawa yulı xäräkäten tikşerüçedänme kilüen bilgeli almawların da citkergän.

“GermanWings” süzçese pilotnıñ 6 meñ säğatlek oçu täcribäseneñ buluın, oçqıçnıñ da ber kön elek kontroldän uzuın añlatqan.

Aviatsiya belgeçläre qazanıñ mexanik problema arqasında kilep çığuın uylıy.

Şirkät räsmi zatları yulçı isemlegeneñ qısqa waqıtta açıqlanaçağın äytä.

Oçqıçqa 67 alman häm 45 İspaniya keşeseneñ utıruı uylanıla.

İspaniya premyer-ministrı Mariano Rajoy qazada yaqtı dönyadan kitüçelär arasında ber azıq-tölek yärminkäsennän qaytuçı İspaniya eşmäkärläre belän alman turistları häm ber törkem alman uquçılarınıñ buluın äytkän.

Germaniya Kantslerı Angela Merkel isä qazanıñ säbäben açıqlar öçen Frantsiya häm İspaniya belän bergä eşçänlek başqaraçaqların beldergän.

İspaniyada 3 könlek matäm iğlan itelgän, Germaniyadağı mäktäplärdä ğomere özelgän uquçı häm uqıtuçılar iskä alınğan.

Amerika Quşma Ştatları däwlät başlığı Barack Obama da yaqtı dönyadan kitkän 150 keşe häm ğailäläre öçen doğa itülären äytkän.

Merkel belän küreşüen beldergän Obama Washingtonnıñ qulınnan kilgän yärdämne kürsätergä äzer buluın citkergän.

Qazadan soñ Germaniyadäge qayber hawa mäydannarında “GermanWings” oçqıç säfärläre ğamäldän çığarılğan.

Şirkättän säfärlärneñ ni öçen ğamäldän çığarıluı belän bäyle açıqlaw yasalmağan.