Ğazzägä 200 million dollarlık yärdäm

İzrail höcümnärendä zıyan kürgän Ğazzäneñ qabat tözekländerelüe öçen Kuveytneñ Fälästingä 200 million dollar külämendä yärdäm kürsätüen küzdä totuçı kileşü Yordaniya başqalası Ammanda imzalanğan.

Kileşügä kürä yärdäm ike yıl eçendä Fälästinneñ Tözekländerü häm tözeleş ministrlığı, Cirle citäkçeleklär ministrlığı, Milli iqtisad ministrlığı, İgençelek ministrlığı häm Fälästindäge Su idaräse küzätüe astında toraq, asqorıma, su, iqtisad häm säwdä kebek törle marmaqlarğa küçereläçäk.

Misır başqalası Qahirädä 12nçe üktäbr könne uzğan xalıqara konferentsiyada qatnaşuçılar Ğazzägä yartısı tözekländerüdä qullanılır öçen 5,4 milliard dollarlık yärdäm kürsätkän ide. Älege aqçanıñ 2,6 milliard dolları Ğazzäneñ tözekländerelüe, 2,8 milliard dollarınıñ da Fälästin xökümätenen kiläse 3 yıllıq byudjetına kertelüe öçen küzdä totılğan ide.

Berläşkän Millätlär Oyışması mäğlümatlärenä kürä İzrailneñ 7nçe iyul könne başlatqan häm 51 kön barğan soñğı höcümnärendä 2 meñ 272 Fälästin keşese yaqtı dönyadan kitkän, 11 meñ 711e yaralanğan häm yaqınça 92 meñ qorılma zıyan kürgän.