Oçqıçnı bärep töşerüçelär cawapqa tartılırğa tiyeş

Awrupa Berlege tışqı eşlär ministrları Ukrainada oçqıçnıñ bärep töşerelüennän soñ Rusiyägä qarata sanktsiyälärne kiñäytüne söyläşü öçen sişämbe könne Bryusseldä cıyıldı.

300gä yaqın yulçı häm ekipaj häläq bulğan waqiğadan soñ berençe tapqır cıyılğan ministrlar oçqıçnıñ bärep töşerelüennän tiräläp yäki turıdan-turı cawaplı buluçılarnıñ ğädälät aldında xisap birüe zarurlığı yullamasın yasadı.

Mäskäw citäkçelegenä qarşı iqtisadi çikläwlärgä küçü yünäleşendä adım yasıy almağan ministrlar bilgele ber maqsatqa yünälgän sanktsiyälärgä qağılışlı äzerleklärneñ tizlätelüe mäs’äläsendä kileşte.

Bu qısada çikläwlär qullanılaçaq yaña räsmi zatlar häm oyışmalar isemlege belän bäyle äzerlek aldıbızdağı könnärdä tizläteläçäk.

Äzerleklär bu ay axırına qädär tämamlanğannan soñ Qırımnıñ Rusiyä Federatsiyäsenä kertelüennän yäki Könçığış Ukrainadağı totrıqsızlıq şartlarınnan faydalanğan keşelärgä häm oyışmalarğa qarata sanktsiyälär kiñäyteläçäk.

Ministrlar cıyılışnıñ yomğaq tekstında Rusiyä Federatsiyäse üzennän kötelgän adımnarnı yasamağan oçraqta yaña sanktsiya paketınıñ soñartılmıyça qabul itelüena äzer buluların da belderde.