"Aşığıç yärdämgä ixtıyac bar"
BMO 800 meñ qaçaq öçen aşığıç yärdäm kürsätergä çaqırdı
Berläşkän Millätlär Oyışması Afrikadağı azıq-tölek qıtlığı arqasında qitğada yäşäwçe 800 meñ qaçaq öçen aşığıç yärdäm kürsätergä çaqırdı.
Berläşkän Millätlär Oyışmasınıñ Jenevadağı ofisında oyıştırılğan urtaq matbuğat oçraşuında Bötendönya azıq-tölek taratu programması başlığı Ertharin
Cousin häm Berläşkän Millätlär Oyışmasınıñ Qaçaqlar yuğarı komissarı Antonio Guterres Afrika qitğasındağı qaçaqlarnıñ yaña yılğa qadär azıq-tölek ixtıyaclarınıñ qanäğatländerelüe maqsatı belän 186 million dollar külämendä aşığıç yärdäm kürsätergä soradı.
Ertharin Cousin: “Afrika qitğasında yäşäwçe qaçaqlarnıñ kübese Bötendönya azıq-tölek taratu programması tä’min itkän azıq-tölek belän genä tuqlana, läkin xäzer finanslawçı probleması arqasında açlıq probleması belän oçraştılar,” – dide.
Könyaq Sudan häm Urta Afrika Cömhüriyätendäge soñğı wazğiyätneñ borçuğa saluın açıqlağan Guterres isä: “Könyaq Sudanda yañğır sezonı da başalğan bu çorda qısqa waqıt eçendä tınıçlıq urnaştırılmağan oçraqta ildä azıq-tölek qıtlığı başlanaçaq,” – dide.
