Dön’ya matbuğatına küzätü 30.06.2021

Yordaniyäneñ “el-Düstur” gazetı Awrupa Berlegenä sıyınu möräcäğat’läreneñ 2020nçe yılda 32%qa kimüen citkerä.

Ğaräp basmalarınnan “el-Quds el-Arabi” yazğança, Paqıstan üz ileneñ ber wäqalätleseneñ noyabr’dä İzrailgä yäşeren säfär yasawı turındağı xäbärlärneñ yalğan buluın belderde.

Katarnıñ “el-Raye el-Qatariyye” gazetı İzrailneñ Qudüs- Yerusalimda cimerü operaśiyälären däwam itüen citkerä.

Germaniyäneñ “Deutsche Welle” gazetı Törkiyä turizmında canlanu xis itelüe xaqında yaza. İyül’ ayında Germaniyä häm Angliyä turistları ağımı kötelä.

Nemeś telendäge zeit.de säxifäse Germaniyägä küçenüçelärneñ sanınıñ 2019nçı yılğa qarağanda 24%qa kimüen xäbär itä.

Şul uq ilneñ welt.de säxifäse yazğança, İrlandiyä 5nçe iyül’gä planlaştırılğan ğadäti tormışqa qaytu plannarın koronavirusnıñ Del’ta variantı arqasında kiçekterä.

 Franśiyäneñ “Le Figaro” gazetı xäbärenä qarağanda, 2023nçe yıldan franśuzlar qabat paraśetomol çığara başlıy.

Franśuz gazetlarınnan “Le Parisien” citkergänçä, Franśiyä ilbaşı Êmmanuêl’ Makron sälamätlek saqlaw tarmağında tikşerenü häm yañartular öçen berniçä milliard yevrolıq planı xaqında belderde 

Argentinanıñ “Infobae” mäğ’lümat çarası Moderna şirkäte tözüçeseneñ “Koronavirus Uxan’ şähärendäge laboratoriyädän çıqtı” digän süzlären citkerä.

Rus telendäge RBK yazğança, Gvatemala idaräse Sputnik V vakśinası öçen tülängän avansnı täêminat soñğa qalu arqasında Rusiyädän kire soradı.

BFM.ru säxifäse Rusiyäneñ xärbi oçqıçlarınıñ Qara diñgezneñ Qırım yarımutrawı yanındağı Kerç’ buğazına bik nıq yaqınlaşqan Niderland bayraqlı “Evertsen” korabın cirlektän yıraqlaştıruı xaqında xäbär itä.

TASS agentlığı xäbärenä qarağanda, “Soyuz” raketası Progress yök korabı belän bergä Baykonur kosmodromınnan Xalıqara ğaläm stanśiyäsenä oçırtıldı.

“Tatar-inform” mäğ’lümat agentlığı yazğança, Tatarstannıñ 38 rayonında êsselek arqasında ğadättän tış xäl kertelde.