Dön’ya matbuğatına küzätü 14.06.2021

Katarnıñ “El-Raya El-Katariye” gazetı yazğança, Soğud Ğaräbstanı bıyıl barı tik watandaşlarına häm patşalıq êçendä yäşäwçelärgä xacğa barunı röxsät itäçäk.

Fälästinneñ “Yeni Hayat” gazetı Fälästin xökümät räise Möxämmät İştiyyäneñ Ğazzäne qabat torğızu öçen Bötendön’ya bankı delegaśiyäsen qabul itüen citkerä.

Omannıñ “El-Vatan” gazetı xäbärenä qarağanda, Oman soltanlığı Franśiyä belän xärbi xezmättäşlek mäydanında kileşü imzaladı.

Germaniyäneñ “Frankfurter Allgemeine Zeitung” gazetı citkergänçä, papa Franśisk Urta diñgezne “Awrupanıñ iñ zur qaberlege” dip atadı.

Germaniyäneñ dpa säxifäse Angliya patşabikäse Êlizabet 2nçeneñ AQŞ ilbaşı Djo Bayden häm xatını Jill Baydennı qabul itüe xaqında yaza.

Nemeś telendäge Tagesspiegel.de säxifäse “Netan’yaxu çorı xäzergä tögällände – İzraildä tarixi xökümät üzgäreşe” dip yaza.

Franśiyäneñ “Le Parisien” gazetı da älege temağa qağıla. “12 yıl xakimiyättä torğannan soñ, Netan’yaxu xäzer İzrailneñ xökümät räise tügel” diyelä anda.

France 24 kanalı NATO sammitı xaqında söyli häm ittifaqnıñ transatlantik mönäsäbätlärdä yaña bit açarğa teläwen citkerä.

İspaniyäneñ “El País” gazetı G-7 liderlarınıñ 2022nçe yılda 1 milliard Kovid-19 vakśinası büläk itärgä süz birüläre turında yaza.

Şul uq ilneñ “La Vanguardia” gazetındağı mäqalägä qarağanda, klimat şartları arqasında barlıqqa kilgän migraśiya rekord däräcäğä citte. 2020nçe yılda 40 million keşe yäşägän urınnarın taşlap kitärgä mäcbür buldı häm monıñ 75%ınıñ säbäbe – tabiğıy afätlär.

Venesuêlanıñ “Telesur” matbuğat çarası Braziliya häm Venesuêlanıñ Kön’yaq Amerika futbol turnirı açılışın tormışqa aşıruın citkerä.  

Rusiyäneñ “RBK” matbuğat çarası yazğança, AQŞ ilbaşı Djo Bayden Rusiyä däwlät başlığı Vladimir Putinnıñ, Vaşingtonnıñ basımına qaramastan, poziśiyäsen üzgärtmäwen xarakter üzençälege belän bäyläde.

 Lenta.ru säxifäse citkergänçä, 17nçe iyün’nän başlap Sankt-Peterburgta tağın da qatğıy karantin çaraları kerteläçäk.

Tatarstannıñ “Tatar-inform” mäğ’lümat agentlığı xäbärenä qarağanda, “Xatlar yortı” proyektı Tatarstannıñ berençe ilbaşı Mintimer Şäymiyevnıñ inauguraśiyäsenä 30 yıl tulu uñayınnan otkrıtkalar çığardı. Älege waqıyğa 1991nçe yılnıñ 4nçe iyülendä bulğan ide.