Dön’ya matbuğatına küzätü 04.2.2021

Nemeś telendäge gazeta “Deutsche Welle” yazğança, Germaniyä kanślerı Angela Merkel’ Rusiyäneñ koronavirus vakśinası “Sputnık V”nıñ üz ilendä qullanıluına qarşı bulmawın belderde.  

Şul uq ilneñ Welt.de säxifäsendäge xäbärgä qarağanda, yevro regionında koronavirus çaraları däwam itkän ğıynvar ayında yıllıq inflyaśiyä 0,9% däräcäsenä citte.

Nemeś telendäge ard.de säxifäse AQŞ xökümäteneñ İran idaräseneñ 2015nçe yılda imzalanğan atom-töş kileşüen qabat ğamälgä kertü täq’dimenä saq qarawı xaqında yaza.

Franśiyäneñ “Le Monde” gazetı yazğança, älege ildä uzdırılğan ber tikşerenü Afrika çığışlı franśiyälelärneñ qıyınsınuların açıqladı. Anketalawda qatnaşuçılarnıñ 73%ı tigez mömkinleklär birelmäwen belderä.

Şul uq ilneñ “Le Parisien” gazetı citkergänçä, Franśiyäneñ xökümät räise Jan Kasteksnıñ pänceşämbe könne cirle waqıt belän kiçke säğat’ 6da uzdıraçaq matbuğat cıyılışında xäzerge wäzğıyät’neñ borçu tudıruçı buluın xäterlätep franśuzlarğa basım yasawı kötelä.

“Le Monde” gazetı Kanadanıñ 'Proud Boys' isemle radikal’ sulçı törkemne terrorçı oyışmalar isemlegenä quyuı turında xäbär itä.

Ğaräp telle basmalardan “Eldustour” yazğança, Yordaniyä xökümäte räise urınbasarı Ayman Safadi häm Rusiyä tışqı êşlär ministrı Sergey Lavrov Fälästindä ike däwlätle çişeleşne assızıqladı.  

“Elraya” gazetı mutaśiyä kiçergän koronavirus variantlarınıñ Katarğa kilep citü mömkinlege artuı turında xäbär itä.

Ğaräp telle “Elqudus” gazetı Törkiyä êksportınıñ ğıynvarda rekord däräcägä citüe xaqında yaza.

İspaniyäneñ “El País” gazetı xäbär itkänçä, älege ildä AstraZeneka vakśinasın 80 yäş’tän ölkännärgä qadamasqa buldılar.

 Argentinanıñ “Infobae” gazetı koronavirusqa qarşı vakśina yasatuçılarnıñ śifrlı passportın buldırğan täwge däwlätneñ Daniya buluın citkerä.

Rusiyäneñ Lenta.ru säxifäse yazğança, Ukrainadağı oppoziśiyä ildäge qayber telekanallarğa sankśiyä kertelüdän soñ däwlät başlığı Vladimir Zelenskiyğa qarşı impiçment prośessın başlarğa uylıy.

Rus telendäge xäbär agentlığı “RİA Novosti” AQŞ Kongressına oppoziśioner Aleksey Naval’nıynı qulğa alu säbäple Rusiyägä qarşı sankśiyä kertü xaqında qanun ölgese täq’dim itelüen citkerä.

Tatarstannıñ “Tatar-inform” mäğ’lümat agentlığı xäbär itkänçä, Qazan federal’ universitetında barlıq teläwçelär öçen buşlay tatar tele kursları açıla.