Dön’ya matbuğatına küzätü 17.12.2020

Katar telekanalı “El-Cezire” citkergänçä, Awrupa parlamentı uquçı  Djuliyä Regeninıñ üterelüe nisbätennän Misırnı İtäliyä belän tulı xezmättäşlek itärgä häm şöbhälelärneñ adresların Rim prokuraturasına birergä çaqırdı.

“El-Raye el-Qatariyye” yazğança, Katar başqalası Doxanıñ 2030nçı yılğı Aziya uyınnarın uzdıruı anıñ bötendön’ya sport başqalası poziśiyäsen köçäytä.

Yordaniyäneñ “El-Düstur” basması xäbär itkänçä, BMO migrantlar yuğarı komissiyäseneñ yaña tikşerenülärenä qarağanda, yordaniyälelärneñ möhacirlärgä qaraşı uñay.

Germaniyäneñ “Deutsche Welle” gazetı yazğança, Törkiyä ilbaşı Räcäp Tayyip Ärdoğan AQŞ sankśiyälären suverenlıq xoquqlarına höcüm dip bäyäläde.

Tagesschau.de säxifäse Germaniyädä koronavirus pandemiyäseneñ başınnan birle 1 kön êçendäge iñ yuğarı ülem sanı terkälüen xäbär itä.

FAZ.net säxifäse citkergänçä, yarlı däwlätlärgä 2022nçe yılğa qadär vakśina yuq. Ber tikşerenü dön’yada yäşäwçelärneñ 14%ın alıp toruçı bay illärneñ 2021nçe yıl öçen küzallanğan vakśina dozalarınıñ yartısınnan kübrägenä zakaz birep quyuın açıqladı.

İspaniyäneñ “El País” gazetı yazğança, belgeçlär koronavirusta artu küzätelü säbäple Yaña yıl kanikullarınıñ ğamäldän çığarıluın teli.

Venesuêlanıñ “Telesur” mäğ’lümat çarası citkergänçä, Urugvay xökümäte Rusiyäneñ “Sputnik V” vakśinasın satıp alu turında uylıy.

Franśiyäneñ “Le Monde” gazetı bu ay axırında 1 million franśuznıñ vakśinalaştırıla başlayaçağın xäbär itä.

Şul uq ilneñ “Le Figaro” gazetı yazğança, cinayät’tä qatnaşqan çit il keşelären deportaśiyäläw belän bäyle referendumnı uñçı partiyä “Les Républicains” yaqlıy.

Rusiyäneñ xäbär agentlığı RİA Novosti citkergänçä, AQŞ Rusiyägä qarşı sankśiyälärne Tön’yaq ağım-2 gazütkärgeç proyektı tulısınça tuqtatılğançı däwam itäçäk.

Şul uq ilneñ “İzvestiyä” gazetı Rusiyäneñ Qara diñgezdäge köymälär öçen yaña küzätü sistemasın sınıy başlawın belderä.

“Tatar-inform” mäğ’lümat agentlığı citkergänçä, İlham Şakirov isemendäge Tatarstan premiyäse iyäläre bilgele.