Törek matbuğatına küzätü 14.12.2020

“Watan” gazetı yazğança Törkiyä saqlanu ministrlığı tarafınnan yasalğan açıqlawda Törkiyäneñ xalıqara xoquq häm yaxşı kürşelek mönäsäbätläre yaqlı buluı assızıqlandı. Açıqlawda: “Törek qorallı köçläre Ägäydä, Könçığış Urta diñgezdä Törkiyä häm Tön’yaq Kipr Törek Cömhüriyäteneñ xoquq häm mänfäğat’lären yaqlarğa, Kipr utrawında xalıqara garantiya häm ittifaq kileşüläre buyınça tınıçlıq häm iminlek urnaştırırğa däwam itäçäk,” – dip äytelde.

“Yeni Şafak” basması beldergänçä Törkiyä Böyek Millät Mäcleseneñ Törkiyä-Azärbaycan Parlamentlarara Duslıq törkeme başlığı Şamil’ Ayrım 30 yıl buyı yawlaw astında bulğan Qarabaxta asqorıma, yäşi alaçaq bina, mäktäp, kitapxanä, cämiğ häm çirkäwneñ qalmawın, barısınıñ da Ärmänstan tarafınnan yuqqa çığarıluın äytte. “Bolar törek şirkätläre tarafınnan tözeläçäk. Yaña toraqlar yasalaçaq, asqorımaları qorılaçaq,” – dide ul.

“Star” gazetı citkergänçä Azärbaycannıñ Diasporadan cawaplı däwlät komitetı başlığı yärdämçese Elşad Aliyev Ärmänstan belän barğan suğışta Törkiyä diasporası belän bergä dön’yanıñ törle illärendä törle çaralarnıñ oyıştırıluın belderep: “Törkiyä härwaqıt diyärlek bezneñ yanda buldı. Zur êşlär başqardıq. Törkiyä diasporası belän Çit ildä yäşäwçe töreklär häm tuğandaş cämğıyät’lär räislegenä räxmätemne belderäm,” – dide.

“Xäbär türk” basması xäbärenä kürä Törkiyäneñ Aviaŝiya häm ğaläm sänägäte TUSAŞ Tunis Hawa köçläre citäkçelegenä 80 million dollarğa 3 ANKA keşesez hawa apparatı häm 3 Cirne kontrol’ itü sisteması tapşıraçaq. Kiläse yıllarda bu sannarnıñ arta aluı turında süz bara. Tunislı 52 pilot häm oçqıç tözekländerü personalına da Änkarada TUSAŞ qorılmalarında kiräkle belemnär bireläçäk.

“Sabah” gazetı yazğança koronavirus kizüe arqasında tuqtap torğan Dubay – İstanbul oçqıç säfärläre qabat başlana. Üzäge Dubayda urnaşqan Flydubai şirkäte açıqlaw yasap, Dubay-İstanbul Sabiha Gökçen aêroportı säfärläreneñ 17 dekabr’dän başlap qabat çınğa aşaçağın citkerde.