Dön'ya matbuğatına küzätü 14.03.2019

Soğud Ğaräbstanında ingliz telendä çığuçı “Alşark Alawsat” gazetı “Şiğıy lider Sistani İran ilbaşı Xasan Ruxani belän oçraştı” dip yaza.

Baxreynda çığuçı “Axbar Al-Xalij” basması yazğança, AQŞ İrannıñ terrorçılıqqa finans yärdäme belän köräşü öçen oyışma tözi.

Germaniyäneñ “Doyç Welle” matbuğat çarası xäbär itkänçä, Soğud Ğaräbstanında keşe xaqların yaqlawçı Ludşain Al-Xatxlul qulğa alınıp 10 ay ütkännän soñ mäxkämägä çığarıla.

Rusiyäneñ “RİA Novosti” mäğ’lümat agentlığı yazğança, Amerika xärbi oçqıçı “Açıq kük yöze” kileşüe qısalarında Rusiyä cirläre östendä küzätü oçışı yasadı.

Şul uq ilneñ “İzvestiyä” gazetında Boing 737 Maks ğailäse oçqıçları turında xäbär bar. Alarnıñ Rusiyädä qullanılışı tuqtatılıp torıla.

Rusiyäneñ TASS xäbär agentlığı Törkiyä tışqı êşlär ministrı Mäwlet Çavuşoğlu belän reportaj urnaştıra. Anda räsmi zat rus telen öyränüe turında belderä. “Rusçanı urta däräcägä citkerdem. Xätta Putin belän şayartaçaq qadär söyläşä alam,”-di ul.

Franśiyäneñ “Liberation” gazetı “Bangladeş meñnärçä roxing’ya möhaciren keşesez utrawğa urnaştıraçaq” dip yaza

İspaniyäneñ “Êl’ Mundo” gazetı Venesuêladağı êlektr ênergiyäsendäge özekleklär säbäple küpläp talaw oçraqları buluı turında söyli

“Tatar-inform” xäbär agentlığı yazğança, Tatarstan ilbaşı Röstäm Miñnexanov AQŞta investiśiyälär cälep iyü buyınça konferenśiyädä qatnaşaçaq.