dönya matbuğatına küzätü 21.12.2016

Franśiyanıñ AFP “Frans Press” agentlığı “Üterelgän ilçe. Ärdoğan Süriyä mäs’äläse belän bergä xezmättäşlekne däwam itterüdä Putin belän kileşte” isemle yazmasında Törkiyä İlbaşı Räcäp Tayyip Ärdoğannıñ Änkaradağı Rusiyä ilçeseneñ höcümdä qorban kitüenä qaramastan Süriyä mäs’äläse belän bergä Rusiyä xezmättäşe Vladimir Putin belän xezmättäşlekne däwam itterü ölkäsendä kileşülären äytüen citkerä:

“Sişämbe könne İstanbulda Bosfor buğazınıñ astınnan uzuçı berençe avtoyul tunneleneñ açılışında çığış yasawçı Ärdoğan: "İlbaşı Putin belän Rusiyä belän törle ölkälärdäge xezmättäşlegebez ölkäsendä, bigräk tä Süriyä mäs’äläsendä ber ük qaraşnı urtaqlaşabız. Bu höcüm xezmättäşlegebezgä yoğıntı yasamayaçaq. Rusiyä belän mönäsäbätlärebezneñ bozıluına hiç tä röxsät birmäyäçäkbez”, - dip äytte”.

Rusiyäneñ “TASS” agentlığı “Urtaq komissiya Rusiyä ilçeseneñ üterelüe cinayäten tikşerä başladı” dip atalğan yazmasında İstanbulda Awraziya tunnelen açu tantanasında çığış yasawçı Törkiyä İlbaşı Tayyip Ärdoğannıñ Rusiyä-Törkiyä urtaq komissiyasınıñ Änkarada Rusiyä ilçese Andrey Karlovnıñ üterelüe cinayäte belän bäyle êşçänlegenä başlawın belderüen xäbär itä:

“Ärdoğan: "Törkiyä belän Rusiyä urtaq tikşerü törkemen buldırdı. Rusiyä wäkilläre kilde häm êşli dä başladılar inde. Berkemgä dä Törkiyä häm Rusiyä mönäsäbätlären bozarğa röxsät birmäyäçäkbez”, - dip äytte.”

Germaniyanıñ DPA (“Deutsche Presse”) agentlığı “Rusiyä, Törkiyä häm İran Süriyädä xezmättäşlegen kiñäytä” isemle yazmasında Rusiyä ilçeseneñ Änkarada üterelüennän soñ berniçä säğättän soñ Rusiyäneñ, Törkiyäneñ häm İrannıñ Süriyä suğışında tağın da yaqın xezmättäşlek mäs’äläsendä kileşülären belderä.

“Mäskäwdä xezmättäşläre belän küreşep söyläşkännän soñ Rusiyä Tışqı êşlär ministrı Sergey Lavrov öç köçneñ Süriyä citäkçelege belän oppoziśiya arasında kileşügä ireşelüe mäs’äläsendä aradaşçılıq häm garantlıq yasarğa äzer buluların belderde. Rusiyä Saqlanu ministrı Sergey Şoygu da sişämbe könne Törkiyä häm İran saqlanu ministrları belän oçraştı. Şoygu ilçe Andrey Karlovnıñ üterelüe belän bäyle bularaq: “Mondıy ğamällärneñ xalıqara mäydanda terrorçılıq belän köräş tırışularıbız belän bäyle buluın añlıybız. Fäqät bu köräştä sülpänlek bulmayaçağın da äytep uzıym”, - dip basım yasadı”.

Amerika Quşma Ştatlarınıñ “Assoşiäyted Press” (Associated Press) agentlığı “Törkiyä Bosforda yaña avtoyul tunnelen açtı” isemle yazmasında Törkiyä räsmiläreneñ İstanbulnıñ Awrupa häm Anadolu yaqların totaştıruçı diñgezastı avtoyul tunnelen açuın xäbär itä:

“Bosfor buğazınnan uzğan Awraziya tunnele Rusiyäneñ Änkara ilçeseneñ ber kön êlek üterelüe belän Törkiyäneñ tetränüenä qaramastan açıldı. İlbaşı Räcäp Tayyip Ärdoğan Törkiyäneñ açılışnı ğamäldän çığarmaw qararınıñ "terrorçılıqqa cawap” buluın häm “terrornıñ kön tärtiplären bilgeläwenä röxsät birmäyäçäklären” äytte. 5,4 çaqrım ozınlığındağı ike qatlı tunnel’ şähär transportın ciñeläytüne maqsat itä. Räsmilär ber köndä 120 meñ maşinanıñ tunnelne qullanuın kötülären äytä”.