Эрдогандан Папага Палестина каты

Президент Режеп Таййип Эрдоган, адамзаттын мындан ары Газада эл аралык укуктун бузулушуна жол бербеши керектигин айтты.

Президенттиктин Коммуникация башкармалыгынын билдирүүсүндө, президент Эрдогандын Ватикандын президенти Папа Францискке Палестина боюнча кат жөнөткөнү кабарланды.

Эрдоган катында, Крым мыйзамсыз аннексияланган 2014-жылдан бери Түркиянын гуманитардык дипломатия урааны менен Украинанын жеринин бүтүндүгүн колдогондугун жана бейкүнөө палестиналыктардын жашоо укугун, адилеттүү ишин жактоодо да алдыңкы катарда болууну улантып жатканын маалымдады.

Түркиянын 2023-жылдын 7-октябрынан бери жөнөткөн 45 миң тоннага жакын гуманитардык жүк менен Газага эң көп жардам көрсөткөн экинчи өлкө экенин баса белгилеген Эрдоган, 450 коштоочусу менен бирге араларында христиандар да болгон 429 газалык бейтаптын жана жаракат алгандардын дарылануусунун Түркияда уланып жатканын айтты.

Эрдоган катын мындайча улантты:

«Адамзат, өлтүрүүгө бардык Ыбрайым диндери тарабынан тыюу салынганын түшүнүп, Газада эл аралык укуктун жана эл аралык гуманитардык укуктун бузулушуна мындан ары жол бербеши керек. Ооруканаларды, мектептерди, мечиттерди жана чиркөөлөрдү атайылап бомбалоого каршы үнүн көтөрүшү керек.

Палестина-Израиль маселеси адилеттүү түрдө чечилмейинче Жакынкы Чыгышта туруктуу тынчтыкты жана туруктуулукту орнотуу мүмкүн эмес. 1967-жылдагы чек араларында, борбор шаары Чыгыш Кудс болгон көз карандысыз, эгемендүү жана аймактык жактан интеграцияланган Палестина мамлекетинин эл аралык коомчулуктун тең укуктуу мүчөсү катары глобалдык системада өз ордун ээлеши маанилүү».

Эрдоган, дүйнө жүзү боюнча жайылган антиисламизм, расизм жана ксенофобия сыяктуу коомчулуктар аралык тынчтыкка жана туруктуулукка коркунуч келтирген акыркы тенденцияларды эске алганда дүйнөнүн, кеңири жана акылга сыярлык саясатка, бардык тараптар менен диалог түзө ала турган актерлорго тарыхта болуп көрбөгөндөй муктаж экенин баса белгиледи.