Чоң жетиликтин тышкы иштер министрлеринин жыйыны эртең башталат

Америка Кошмо Штаттары (АКШ), Германия, Франция, Англия, Италия, Канада жана Япониядан турган G7 өлкөлөрүнүн тышкы иштер министрлери эртең Италиянын кожоюндугунда жолугуп, эл аралык күн тартибиндеги маселелерди талкуулашат.

Өнөр жайы өнүккөн G7 тобуна кирген өлкөлөрдүн тышкы иштер министрлери Капри аралында Италиянын вице-премьер-министри жана тышкы иштер министри Антонио Таянинин жетекчилигиндеги жыйында 2 күн бою эл аралык күн тартибиндеги маселелерди сүйлөшүшөт.

Италиянын Тышкы иштер министрлигинен берилген жазуу түрүндөгү маалыматка караганда, жыйында Жакынкы Чыгыштан баштап Ирандын Израилге кол салуусу жана андан кийинки окуялар менен Газа жана Кызыл деңиз кризиси каралат.

Чоң жетиликтин тышкы иштер министрлери Орусиянын Украинага чабуулун да талкуулай турган жыйынга Таяни Украинанын тышкы иштер министри Дмитрий Кулеба жана НАТОнун баш катчысы Йенс Столтенбергди да чакырды.

Италия өкмөтүнүн өзгөчө кызыкчылыгына ылайык, жыйындын күн тартибинде Африка да болот.

Бул сессияга Мавританиянын тышкы иштер министри, Африка союзунун (AfB) төрагасы Мохаммед Салим Мерзук катышат.

Сессияда Чоң жетиликтин Африка менен өнөктөштүгүн чыңдоо темасы каралат.

Жыйында Индо-Тынч океан аймагынын туруктуулугу, жасалма интеллект, кибер коопсуздук, инфраструктуралык байланыштар жана жалган маалымат менен күрөшүү маселелери да талкууланат.