Израиль Чыгыш Иерусалимде 1839 мыйзамсыз жаңы турак-жай куруу үчүн тендер ачты

Израиль оккупацияланган Чыгыш Кудста 1839 мыйзамсыз жаңы турак-жай куруу үчүн тендер ачты.

Израилдин бейөкмөт уюму Ир Амимдин жазуу түрүндөгү билдирүүсүнө караганда Тель-Авив башкаруучулугу Чыгыш Кудста  1839 үйдүн курулушу үчүн 25-декабрда үч тендер ачты.

Буга ылайык Иерусалимдеги Скопус тоосунда 500 үй, шаардын түндүгүндөгү Француз дөбөсүнө 1039 үй жана Чыгыш Кудстун түштүгүндөгү мыйзамсыз Чыгыш Талпиот жөөт отурукташуу жерине 300 үй курулат.

Билдирүүдө бул кадамдын Газа согушу башталган 7-октябрдан бери Чыгыш Кудстагы мыйзамсыз жөөт конуштарынын кеңейүү толкунунун бир бөлүгү экени жана өкмөттүн азыркы абалдан пайдаланып жатканы белгиленди.

Израилде ашыкча оңчул партиялардын коалициясы түзгөн Беньямин Нетаньяху өкмөтү бийликке келген күндөн бери басып алган Палестина жерлеринде мыйзамсыз жөөт конуштарын курууну тездетип жатат.

Израиль 1967-жылы басып алган Чыгыш Кудстагы үстөмдүгү жана ал жерде курган жөөт конуштары эл аралык мыйзам боюнча  мыйзамсыз деп табылды.