Прайс Түркияга көңүл айтты

Америка Кошмо Штаттарынын (АКШ) Мамлекеттик департаментинин басма сөз катчысы Нед Прайс, 6-февралда болгон жер титирөөлөрдүн акыркы кылымдагы эң катуу жер титирөөлөр экенин айтты.

Күнүмдүк маалымат жыйынында Прайс, "кылымдын апааты" деп сыпатталган жер титирөөлөрдөн каза болгондорго байланыштуу көңүл айтты.

АКШнын Түркия жана Сирия калкына жардам берүү үчүн иш-аракеттери жүргүзүп жатканын белгилеген Прайс, каза болгондордун арасында 3 АКШ жаранынын да бар экенин билдирди.

Басма сөз катчы: «Бул жер титирөө кылымдын эң катуу жер титирөөлөрүнүн бири болуп калды жана мындан жабыркагандарга, аман калгандарга, куткаруу топторуна, жардам көрсөтүү топторуна, үй-бүлөлөргө, кошуналарга жана жакындарына көңүл айтабыз», - деди.

АКШнын 200 кишиден турган апаатка жардам берүү тобунун аймакта экенин билдирген Прайс, топтун 77 тонна атайын техника менен барганын белгилеп: «Мындан тышкары, бетон майдалагычтарды, генераторлорду, медициналык буюмдарды, чатырларды, суу жана суу тазалоочу системаларды жөнөтөбүз. Америкалык тик учактар ​​кыйрандыдан улам кирүүгө кыйын болгон аймактарга куткаруучуларды ташууда. Ошондой эле аймактагы кошумча колдоо жабдууларын алдын ала жайгаштырып жатабыз, алар жардам көрсөтүүгө салым кошот деп үмүттөнөбүз»,-деди.

АКШнын мамлекеттик катчысы Энтони Блинкендин тышкы иштер министри Мевлүт Чавушоглу менен телефон аркылуу сүйлөшкөнүн кабарлаган Прайс: «Түркия буга чейин көптөгөн өлкөлөргө гуманитардык жана куткаруу адистерин жөнөткөндөй эле, биз да Түркияга жардам берүү үчүн глобалдык аракетке кошулганыбызга сыймыктанабыз»,-деп айтты.

«Түркиянын муктаждыктарын камсыз кылуу үчүн колубуздан келгендин баарын кылабыз»,- деген Прайс, Сириядагы жер титирөөдөн жабыркагандарга да колдоо көрсөтүүгө аракет кылгандарын маалымдады.