Крымда ок-дары сакталган кампада жарылуу болду

Орусия тарабынан мыйзамсыз аннексияланган Крымда убактылуу сакталган ок-дарылар жарылды.

Орусиянын Коргоо министрлигинен берилген маалыматта, Крымдын Жанкөй аймагындагы Майское айылына жакын жерде аскердик бөлүккө таандык ок-дарылар убактылуу сакталган аянтта өрт чыкканы белгиленди.

Өрттүн кесепетинен ок-дарылардын жарылып кеткени айтылды.

Окуяда жабыркагандар болбогону, аймакка өрт өчүрүүчүлөрдүн жөнөтүлгөндүгү маалымдалды.

Өрттүн келип чыгуу себептери иликтенип жатат.

Майское айылына жакын жайгашкан Жанкөй шаарындагы электр көмөкчордонунан да өрт чыкканы билдирилди.