Бельгияда өкмөткө каршы митинг

Бельгиянын борбор шаары Брюсселде 60 миңдей киши өкмөттүн иш мыйзамы реформасына каршы акция өткөрдү.

Тынчтыкчыл түрдө башталган митингдерге аягында зомбулук аралашты. Полиция менен демонстранттардын ортосунда катуу тирешүү болду.

Ызырынган митингчилер көчөлөрдөгү полиция тосмолорун өрттөдү, көчөлөрдөгү белгилерди сындырды, полицияга фейерверк атып, таш ыргытты.

Полиция жогорку басымдуу суу чачып жооп кайтарды. Айрымдары суу чачылса да качпай туруштук берди. Көп сандаган киши жаракат алды.

Коопсуздук күчтөрү кармап алган айрым митингчилерди сүйрөп барып унаага салышты. Митингчилер өкмөттүн жумушчулардын иштөө убактысын 45 саатка жеткирүүнү да көздөгөн жаңы реформа пландарына каршы чыгууда.