ԱՄՆ ընդգծել է, որ Թուրքիան ՆԱՏՕ-ի «արժեքավոր» դաշնակիցն է
Ամերիկայի Միացյալ Նահանգները (ԱՄՆ) ընդգծել է, որ Թուրքիան ՆԱՏՕ-ի «արժեքավոր» դաշնակիցն է և հայտարարել է, որ իրենք շարունակելու են աշխատել Անկարայի հետ դաշինքի ամրապնդման ուղղությամբ։
ԱՄՆ Պետդեպարտամենտի խոսնակ Մեթյու Միլլերին հարցրել են Թուրքիային ՆԱՏՕ-ից հեռացնելու կոչերի մասին՝ նախագահ Ռեջեփ Թայիփ Էրդողանի հայտարարություններից հետո, թե Համասը ահաբեկչական կազմակերպություն չէ։
Նա պատասխանել է հետևյալը․
«Չնայած այս հարցում մեր տարաձայնություններին, կարող եմ ասել, որ Թուրքիան ՆԱՏՕ-ի արժեքավոր դաշնակից է»։
Ասելով, որ իրենք շարունակելու են աշխատել Անկարայի հետ դաշինքի ամրապնդման համար, Միլլերը հիշեցրել է նաև, որ Շվեդիայի՝ ՆԱՏՕ-ին անդամակցելու արձանագրությունն ուղարկվել է Թուրքիայի խորհրդարան։
«Մենք անհամբեր սպասում ենք նրանց (Թուրքիայի) հետ համագործակցությանը ՆԱՏՕ-ի ամրապնդման համար»,- ասել է Միլլերը։ Նա ընդգծել է, որ դա ներառում է ՆԱՏՕ-ին Շվեդիայի անդամակցության արագ իրականացումը։
Ընդգծելով, որ խնդրո առարկա վեճը թուրքական վարչակազմի հետ իրենց ունեցած առաջին անհամաձայնությունը չէր, խոսնակն ասաց, որ իրենք դեռևս Թուրքիային տեսնում են որպես ՆԱՏՕ-ի արդյունավետ և կառուցողական դաշնակից։