«‹TRT World› téléwiziye qanili» émmiy mukapatigha érishti
türkiye radiyo - téléwiziye idarisi — TRT téléwiziyechilik saheside dunya boyiche eng dangliq émmiy mukapatigha érishti.
türkiye awazi radiyosi xewiri: «‹TRT World› téléwiziye qanili» teripidin ishlengen zenjirsiman mukapatliq höjjetlik filim «Off the Grid» ning ukrainada süretke élinghan «ukrainadiki urushning kündilik xatirisi» qismi, xelqara téléwiziye senetliri we penliri akadémiyesi teripidin tarqitilidighan xelqara émmiy mukapatining «xewerler we kündilik weqeler» katégoriyeside minglighan höjjetlik filimler arisidin tallinip émmiy mukapatigha layiq körüldi.
amérika qoshma ishtatlirining nyu york shehiride ötküzülgen murasimda, mukapatni höjjetlik filimni ishligüchiler mohsiné ennaimi we aléksandiré pawliat tapshuruwaldi.
mukapat tarqitish murasimigha qatnashqan türkiye radiyo - téléwiziye idarisining muawin bash mudiri ömer faruq tanriwerdi mundaq dédi: ««elwette, (bu mukapatqa layiq körülgenlikimiz üchün) özimizni intayin pexirlik hés qilimiz hem buningdin intayin xushalmiz. biz érishken bu mukapat ‹TRT World› qanilining xelqara xewerchilik we tarqitish ishlirida qolgha keltürgen muweppeqiyetlirining ispatidur. < Off The Grid> etritini öz ichige alghan barliq méhnetkesh dostlirimizni qizghin tebrikleymen.»
«‹TRT World› téléwiziye qanili» ning diréktori bora bayraqtar mundaq dédi:
«bu mukapat aldi bilen ‹TRT World› qanilining, jümlidin türkiye radiyo - téléwiziye idarisining qanchilik derijide zor muweppeqiyetlerni qolgha keltürüwatqanliqini, xelqara ölchemde tarqitish bériwatqanliqini, xelqara ölchemde xewerchilik qiliwatqanliqini ispatlap berdi. bashqiche éytqanda, bu amérika qoshma ishtatliridiki téléwiziyechilik sahesisiki eng chong mukapat hésablinidu. türkiyede ishlengen bir höjjetlik filim tunji qétim bu mukapatqa érishti. shunga biz buningdin intayin pexirlinimiz.»
mohsiné ennaimi bilen aléksandiré pawliat ishligen we haqan xojaoghlu süretke alghan höjjetlik filimde, ukrainada 2022 – yili féwral éyida partlighan urushning wehshiy yüzi heyran qalarliq shekilde körgüchilerning diqqitige sunulidu. bu yerdiki puqralarning we rusiye armiyesining turmushidiki özgirishler eks ettürülidu.
