shiwétsiyede daniyelik ongchil rehber quran kerimni köydürdi
shiwétsiyening linkoping shehiride daniyelik esebiy ongchil qattiq yönilish herikitining rehbiri rasmus paludan, saqchilarning qoghdishi astida quran kerimni köydürdi.
türkiye awazi radiyosi xewiri: paludan, saqchilarning hemrahliqida linkoping shehiride musulmanlar olturaqlashqan rayondiki bir meydangha bardi. andin u, qolidiki quran kerimni yerge qoyup, naraziliqlargha pisent qilmastin, muqeddes kitabqa chaqmaq bilen ot tutashturup, quran kerimni köydürdi.
meydangha toplanghan texminen 200 kishilik guruppa, paludangha qattiq naraziliq bildürdi, hemde irqchi rehberning ighwagerchilikige yol qoyulmasliqi toghruluq saqchilargha chaqiriqta boldi.
saqchilarning bu chaqiriqlarni ret qilishi sewebidin meydanda weqeler yüz berdi. mezkur guruppa yolni taqidi we saqchilargha tashlar bilen hujum qildi.
oxshimighan rengler partiyesining reisi mikail yüksel, irqchi islam düshmini paludanning, saqchilarning qattiq qoghdishi astida shiwétsiyening oxshimighan sheherliride quran kerimni köydürüsh ighwagerchiliklirini dawamlashturuwatqanliqini eskertish bilen bir waqitta, quran kerimni köydürüsh üchün, bolupmu musulmanlar yashawatqan mehelliler we jamelerning yéqin etraplirini tallawatqan paludangha yol qoyuluwatqanliqini tekitlep mundaq dédi: «kishilik hoquq, din we wijdan erkinlik eng yüksek sewiyede qoghdilidighan shiwétsiyede, saqchilarning qoghdishi astida musulmanlar yashawatqan mehellilerde quran kerim köydürülüwatidu. saqchilar, musulmanlarni köz aldilirida muqeddes kitablirining köydürülüshini soghuqqanliq bilen közitishke chaqirmaqta. buning qandaqlarche eqlini yoqitish ikenlikini héch chüshinelmeywatimen.»
