mirziyoyéwning enqere ziyariti

türkiye awazi radiyosi: özbékistan pirézidénti shewket mirziyoyéw «türkiye - özbékistan istiratégiyelik aliy hemkarliq kéngishi» yighini dairiside, 19 – 20 – féwral künliri türkiyede dölet ishliri ziyaritide boldi. mirziyoyéw enqerede jumhur reis rejep tayyip erdoghan teripidin resmiy murasim arqiliq qarshi élindi. kéyinche ikki rehber ayrim körüshti. «türkiye – özbékistan istiratégiyelik aliy hemkarliq kéngishi» yighinidin kéyin, ikki dölet otturisida 4 türlük kélishim imzalandi. bu yerde, yéqinqi ikki yil ichide ikki dölet otturisida 48 türlük kélishimning imzalanghanliqinimu alahide eskertip ötüshke toghra kélidu.

türkiye – özbékistan munasiwetliri 2014 – yildin buyan qaytidin shekillenmekte. mirziyoyéwning pirézidéntliqqa saylinishidin kéyin bu munasiwetler yenimu yüksek sewiyege yetti, enqere ziyariti arqiliq istiratégiyelik sewiyege yetküzüldi. rehberlerning yéqinqi yillarda özara ziyaretliri, türk kéngishi, islam hemkarliq teshkilati qatarliq xelqaraliq teshkilatlardiki uchrishishlirimu ikki dölet munasiwetlirining küchiyishide türtkilik rol oynimaqta.

türkiye – özbékistan munasiwetliri türlük sahelerde uchqandek tereqqiy qilmaqta. buningdin bir ilgiri özbékistan türkiye puqralirigha qarita 30 künlük sayahetliride wiza almasliq tüzümini yolgha qoydi. özara ayropilan seperliri peqet istanbuldin paytext tashkentkila emes, buxara, semerqend sheherlirigimu ishqa ashurulushqa bashlidi. bu sayida 2019 – yili her ikki tereptin sayahetchiler özbékistan we türkiyening herqaysi sheherlirini ziyaret qildi. türkiye sayahet sahesidiki tejribe – sawaqlirini özbékistan bilen ortaqlashmaqta.

pirézidént mirziyoyéw enqerede aldinqi qatarda turidighan türk soda dunyasining wekilliri bilenmu körüshti. uchrishishta, özbékistandiki sélinma imkaniyetliri heqqide muzakire élip bérildi. ikki dölet otturisidiki soda omumiy sommisi 2019 – yili 2.2 milyard dollar éship, enqerediki yighinda rehberlerning bu reqemni 5 milyard dollargha yetküzüsh pilani tüzüshige zémin hazirlap berdi. ziraet bankisining özbékistanda shöbisining échilishi, u yerde qurulghan türk shirketlirining sanining 1300 din éship kétishi we türkiyening sélinmilirining türlük sahelergiche kéngishi qatarliq amillarmu bu pilanning qisqa waqit ichide orunlinidighanliqidin dérek bermekte.

özbékistan, türkiye we pakistan 2019 – yilining aprél éyida tunji qétim ortaq herbiy maniwér ötküzdi. bixeterlik sahesidiki bu hemkarliq tashkent we enqerening buningdin kéyin hemkarliqni yenimu yüksek sewiyege yetküzidighanlining eng roshen namayendisi, elwette. türkiye bilen özbékistan afghanistanda muqimliqning ishqa ashurulushi üchünmu ortaq paaliyet élip barmaqta. ikki döletning mudapie sanaiti sahesidiki hemkarliqi hem her ikki döletke hemde rayonning bixeterlikige nahayiti zor töhpilerni qoshidu.

«jumhur reislik sariyi millet kutubxanisi» ning échilishining mirziyoyéwning ziyaritige toghra kélishi muhim idi. özbékistan türkistanning merkizige jaylashqan bir dölet bolup, paytext tashkentni öz ichige alghan özbékistanning herqaysi sheherliride türk – islam dunyasining qanchilighan bibaha xeziniliri özbékistan sirtidiki alimlarning köp yönilishlik tetqiq qilishini kütmekte. türkiye maarip, diniy we bilim saheside özbékistan bilen hemkarliq  layihelirini ishqa kirishtürdi.

baku bashliqlar yighinida türk kéngishige eza bolghan özbékistanning, tüksoy, türkiy tilda sözlishidighan döletler parlamént ezaliri kéngeshmisi qatarliq xelqaraliq teshkilatlardimu aktip bolushi türkiye – özbékistan munasiwetlirige ijabiy tesir körsitidu. hiwe shehirining bu yilliq türk dunyasining medeniyet paytexti qilip békilitishimu nahayiti zor ehmiyetke ige.

yighip éytqanda, shewket mirziyoyéwning türkiye ziyariti ikki dölet munasiwetlirining yenimu yüksek sewiyege yetküzülüshi jehettin nahayiti muhim bolup, jumhur reis erdoghanmu mirziyoyéwni biwasite qarshi élish hem kütüwélish arqiliq ikki terep munasiwetlirining buningdin kéyin eng yüksek sewiyede dawamlashturulidighanliqini namayen qildi.