xongkongda namayishchilarning saqchilargha qarshi bomba ishletkenliki ilgiri sürüldi
saqchi mesulliri yekshenbe küni ötküzülgen namayish jeryanida, saqchilargha yerlik usulda yasalghan we yiraqtin bashqurulidighan tizgineklik bomba bilen hujum qilinghanliqini élan qildi.
türkiye awazi radiyosi xewiri: xitayning xongkong alahide memuriy rayonida qanchilighan aydin buyan dawamlishiwatqan namayishlarda, tünügün (13-öktebir) tunji qétim saqchilargha yerlik usulda yasiwélinghan we yiraqtin bashqurulidighan tizgineklik bomba bilen hujum qilinghanliqi ilgiri sürüldi.
saqchilarning bomba pachaqlash etriti mesulliridin chin chiyu suryanto axbarat élan qilish yighini chaqirip, yekshenbe küni ötküzülgen namayish jeryanida, saqchilargha yerlik usulda yasiwélinghan we yiraqtin bashqurulidighan tizgineklik bomba bilen hujum qilinghanliqini bildürdi.
chin chiyu hujumda adem ölüsh yaki yaridar bolush weqesi körülmigenlikini tekitlep, awat chong kochida partlighan bombining intayin küchlük ikenlikini uqturdi.
chin chiyu namayishchilarning partlatquch ishlitishini térrorluq paaletlirige oxshatti we bu qétimqi partlashning yéqindin buyan hökümetke qarshi ewj alghan namayishlarning zorawanliqqa aylanghanliqining pakiti bolghanliqini éytti.
muawin saqchi mudiri tang ping kéungmu axbarat élan qilish yighini chaqirip, partlatquchning saqchi aptomobildin 2 métir yiraqliqta partlighanliqini, belkim saqchilarni hujum nishani qilghan bolushi mumkinlikini bildürdi.
tang ping namayishlarda tunji qétim partlatquch ishlitilgenlikini qeyt qildi.
