eyyub eleyhissalam (3)

türkiye awazi radiyosi xewiri: andin u pütün küchini ishqa sélip, bu qesirni weyran qiliwetti, qesir ichidiki kishilerning hemmisi xarabilikning astida qaldi.

rezillerche meqsitige yetken leniti sheytan eyyub eleyhissalamning aldigha bérip, qayghurghan qiyapetke kiriwélip uninggha:

- eger sen perzentliringning ölüp ketkenlikini bilseng, perwerdigaringning  kéche-kündüz qilghan taet – ibadetliringni qobul qilmighanliqini, séning ishliringghimu köngül bölmeydighanliqini tonup yetken bolatting,  - dédi.

- köngli qattiq yérim bolup, öksüp – öksüp yighlighan eyyub eleyhissalam cheksiz musibetke chömüp yürek - baghri xun bolup ketken bolsimu, emma sewr - taqet qilip mundaq dédi:

- perwerdigarim manga ata qilghanlirini yene mendin qayturuwaldi, rebbim meyli manga bersun yaki mendin tartiwalsun, meyli ghezeplensun yaki razi bolsun weyaki manga ziyan - zexmet yetküzsun, men allah taalagha menggü shükür qilghinim qilghan, hemdusana éytqinim éytqan.

eyyub eleyhissalam leniti sheytanning weswesiliri we ighwagerliklirige qilche pisent qilmay, ene shundaq dep allah taalagha taet - ibadet qilishni izchil dawamlashturdi.

qanche qilipmu meqsitige yételmigen leniti sheytan yene allahning dergahigha bérip mundaq dédi:

- i ulugh perwerdigarim! eyyub pul – malliridin ayrilip qaldi, perzentlirimu halak boldi, lékin u ilgiridekla saghlam turuwatidu. u shunche éghir musibetke duch kelgen bolsimu, biraq pul – mallirini qolgha keltürüsh we perzentlirini tirildürüsh meqsitide sanga bolghan étqadini suslashturmay, sanga taet – ibadet qilishni dawamlashturuwatidu. séning manga uni yene bir qétim sinap körüshümge ijazet bérishingni ötünimen. men bu qétim uni salametlikidin mehrum qilimen. men uninggha azghina dora arilashturup bériwetkendin kéyin, bedinige késel yépiship, yiqilsila, u sanga bolghan taet – ibaditini tashlaydu. ene shu chaghda men uning sanga yalghan itaetmenlik qilishtek niqabini yirtip tashlaymen. shuning bilen, u sanga hemdusana éytishnimu untup qalidu.

allah taala peyghembiri eyyub eleyhissalamdin ixlasmen we sadaqetmen bendisi bolup qélishini, ata qilghan éhsanliri hem németlirige shükür qilip, sewr - taqet qilghuchi bolup qélishini ümid qildi.  uning ish – izlirining azab - oqubet tartqanlar üchün teselli bolup qélishini irade qildi, uni paniy dunyada japa – musheqqet tartquchilarning tunji ülgisi, tewrenmes , qeiy we küchlük étiqadning mislisiz nemunisi qildi, uni insanlarning izzet – hörmitige sazawer qildi, qiyamet künimu uni mislisiz shan – shereptin behrimen qilidighanliqi toghruluq wede berdi.

pütkül kainatning terbiyetchisi bolghan allah leniti sheytanning telipige binaen mundaq dédi:

- men sanga eyyubni yene bir qétim sinap körüshüngge ijazet bérimen. lékin sen uning rohiy dunyasi, tili, yüriki we iradisige diqqet qilghin, chünki tewrenmes étiqadning siri ene shularda bolup, diniy bilimlermu ashu yerde ipadilinidu.

leniti sheytan bir amallarni qilip eyyub eleyhissalamni késelge giriptar qilish meqsitige yetti.  biraq u leniti sheytanning kütken yéridin chiqmay, burunqidekla kéche-kündüz allah taalagha taet – ibadet qilishni izchil dawamlashturdi. késili éghirlashqanséri téximu jasaretke kélip, perwerdigarigha shunche taet - ibadet qildi, musibetke yoluqqanséri iradisi téximu kücheydi.

künler, aylar hetta yillar bir – birini qoghliship, ene shu yosunda ötti, eyyub eleyhissalam éghir késel azabigha sewr – taqetni qalqan qilip berdashliq berdi, uruqlap bir tére bir ustixan bolup qaldi. yüzi kichiklep, chirayi soldi. waqitning ötüshige egiship, aghriq azabi uni xatirjem uyqudin mehrum qildi. dost – buraderlirimu, yéqin – yoruqlirimu asta – asta uningdin özini tartti, beziler téxi uningdin bizar boldi.

uning yénida peqet méhriban, köyümchan ayalila qélip, pütün küchi we zéhnini ishqa sélip uni kütti. eyyub eleyhissalamning bu xotunining köngül – köngsi keng bolup, éri éghir késelning azabini tartqanda, umu teng azablandi. eyyub eleyhissalam orun tutup yétip qalghan künlerdimu perwerdigarigha bolghan étiqadi qilche tewrenmidi.