daniyal eleyhissalam (2)

türkiye awazi radiyosi xewiri: ular serkeshlerche mundaq dédi:

- her birimizning birdin ilahimiz bar, shunga bizning körmigen allah bilen ishimiz yoq. bu gepni anglighan daniyal eleyhissalam ulargha jawaben mundaq dédi:

- but dégen yalghan nerse tursa, uni qandaqmu ilah dep qobul qilghili bolsun! buni her bir adem qol bilen yasiyalaydu. uning üstige, silerning ata – bowanglar hergizmu bundaq bolmighur ishlarni qilghan emes. siler nadanliq qilip, bundaq qilishni dawamlashturuwéridighan bolsanglar, allah taala silerni qattiq azabqa duchar qilidu. shunga siler gépimge qulaq sélip, peylinglardin yéninglar.

israil oghulliri daniyal eleyhissalamning wez – nesihetlirini zadila qobul qilmidi. ularning padishahining ismi «teyqur» bolup, u daniyal eleyhissalamni öltürüwétish üchün izdigen bolsimu, emma uni héchyerdin tapalmidi. allah taala daniyal eleyhissalamni ghayib qilghan we öz panahida saqlighanidi. bir küni daniyal eleyhissalam peyda bolup mundaq dédi:

- gépimge obdan qulaq sélinglar, silerni toghra yolgha bashlighan we imangha dewet qilghan bolsammu, lékin siler qobul qilmidinglar. shunga emdi men silerge ölümni bashlap kélimen.

halbuki, ular  ölümni untup qilghanidi. kütülmigende ölüm yétip keldi, arqidinla insanlar ölüshke bashlidi. shuning bilen, ular yighilip padishahning aldigha kélip, daniyal eleyhissalam üstidin shikayet qilip mundaq dédi:

- i padishah, daniyal ölümni élip kélip, insanlarni öltürgili turdi. buni anglighan padishah:

- ölüm dégen yoq gep, ular uxlawatqan bolsa kérek, shunga, ot yéqip béqinglar.

israil oghulliri padishahning déginidek qilip, ot yéqip baqqan bolsimu,  biraq ölgenler orunliridin turmidi. ular yene padishahning aldigha kélip ehwalni melum qilghanidi, padishah:

- gerche daniyal ölümni bashlap kelgen bolsimu, emma biz ölümge hergizmu yol qoymaymiz, - dédi. arqidinla padishah chong bir saray yasitip, insanlarni uninggha kirgüzüp, derwazisigha qilich, xenjerler bilen qorallanghan pasibanlarni qoydi, bir gümbez yasitip, ichige özi kirip, derwazisigha qoralliq pasibanlarni qoydi we ulargha tapilap mundaq dédi:

- buning ichige ölümni qetiy kirgili qoymanglar!

künlerning biride padishah uyqudin oyghinip qarisa, aldida heywetlik bir adem turatti, aldirap ornidin turup:

- siz kim bolisiz? - dep sorighanidi, u adem mundaq jawab berdi:

- men jan alghuchi bolimen.

padishah u kishini hörmet – éhtiram bilen textke teklip qildi we yalwurghan halda mundaq dédi:

- i jan alghuchi, ötünüp qalay, bir kün texir qiling, ete qobul qilay.

padishahning bir künlük ömri qalghanidi. u küni jan alghuchi perishte qaytip ketkendin kéyin, padishah chiqip pasibanlargha achchiqlap:

• jan alghuchini némishqa qéshimgha kirgili qoyushtung? - dep warqiridi, arqidinla ularning hemmisini jallatlargha buyruq qilip öltürgüzüwetti. gümbezning yochuqliri bar oxshaydu dep, yéngiwashtin ich – téshini suwatti. derwazigha küchlük pasibanlarni qoyup, xatirjem olturghan bir peytte, ushtumtut ezrail eleyhissalam kirip kélip, qattiq azab bilen uning jénini aldi.