zulum menggülük dawamlashmaydu

türkiye awazi radiyosi: éziz qérindashlirim, hemminglarning jümeyinglar mubarek bolsun! ulugh perwerdigarimiz ayeti kerimeside «silerning aranglardiki zulum qilghanlarning béshigha kélish bilenla cheklinip qalmaydighan bala ـ qazadin saqlininglar, bilinglarki, allahning azabi qattiqtur.» (enfal sürisi 25 – ayet) dése, peyghember eleyhissalam hedis sheripide bizni agahlandurup, «insanlar bir zalimni körüp uninggha tosqunluq qilmisa, allahning ularni omumiyüzlük bir azabqa duchar qilishi muqerrerdur» (tirmizi, tefsiyrul quran) deydu.

qérindashlirim! islam jughrapiyesi asminida uzundin béri qara bulutlar leylep yürmekte. bir terepte afriqida höküm sürüwatqan acharchiliq we qurghaqchiliq tüpeyli minglarche bala achliqtin ölmekte, ming epsuski yene on minglarche insan ölümge qarap ilgirilimekte. yene bir terepte, yillardin buyan yéqin etrapimizda dawamlishiwatqan  urushta minglache kishi hayatidin ayrildi. bigunah ayallar we balilar bombilarning, ximiyelik qorallarning astida janlirini teslim qilmaqta.

éziz qérindashlirim! téxi bir qanche kün ilgirila süriyening idlib shehiride insap tuyghusi we wijdan közi oyghaq barliq kishilerning qelbide chongqur jarahetlerni peyda qilghan bir qirghinchiliqqa guwah؛ ximiyelik qorallarning hujum nishanigha aylanghan balilarning dilni iziwétidighan peryadlirigha qayghurush ichide shahit bolduq. emma shuni onutmasliq kérekki, bu wehshiyliq qanchilik qorqunchluq bolsa, insaniyetning bu zulumgha süküt qilip turushi, naraziliq sadalirini yangratmasliqi téximu qorqunchluqtur. bu wehshiylikni toxtitish üchün qilchilikmu küch chiqirilmasliqi wabali téximu éghirdur. nöwette zulumgha uchrighuchilarning hayatidin ayrilishidinmu azabliq achchiq bir réalliq bar؛ u bolsimu insaniyetning wijdanidin ayrilip qélishidur؛ duch kelgen müshkülat, dawamlishiwatqan azab, qiliniwatqan zulum aldida künséri biperwalishishidur.

qérindashlirim! islamgha iman keltürgen möminler bolush süpitimiz bilen, bu rehimsizlik aldida insanliqimizdin nomus qiliwatimiz. rehmet peyghembiri muhemmed eleyhissalamning «zalimning zulmini toxtatmay turup, silerge nijatliq yoqtur» (ibni maje, fiten) dégen agahlandurushi aldida tinimiz jughuldimaqta. zulumgha uchrighuchilar üchün öteydighan insanliq burchimizni, qérindashliq mesuliyitimizni toluqi bilen ada qilalmasliqning küchlük xijilchanliqini chekmektimiz. biraq, qandaqla bolmisun shuni bilimizki, bizning wezipimiz imanimizni, ümidimizni we jasaritimizni yoqitip qoymastin dilimizni birleshtürüp, zulumgha uchrighuchilarning sépidin orun élishtur, zalimgha qarshi chiqishtur.

qérindashlirim! shuni onutmasliqimiz kérekki, eskilik, nacharliq adettiki ishqa aylinip qalghan, zorawanliqqa biperwalarche muamile qilinghan chaghda, zulum peqet zulumgha uchrighuchilarghila emes, pütkül insaniyetke yéyilidu. dunyawi zulumning gunahidin pütkül insanlar nésiwisini alidu. shunga, naheqchilikni körgen herqandaq kishi uninggha qarshi chiqishi kérek. qayghurup waysap qoyush, tolghinip ingrap qoyush bilenla boldi qilmastin, zulumni yoqitish üchün heriket qilishi lazim.

qérindashlirim! biz shuninggha ishinimizki, bu qirghinchiliqlar, bu qaidisiz zulmetlik urush bir küni elwette axirlishidu. biz shuni bilimizki, bigunah insanlarning qanliri üstige berpa qilinghan héchqandaq hökümranliq mewjut bolup turmaydu, turalmaydu. köz yashliri we qan toxtimighan bu rayonda allahning izni bilen bir küni adalet we heqqaniyet qaytidin bash kötüridu. zalimlar bu dunyadimu, axirettimu özliri layiq bolghan jazani tartidu. peyghember eleyhissalamning tebiri boyiche éytqanda, «zulumgha uchrighuchi bilen allah taalaning arisida héchqandaq perde yoqtur.» (buxari, zakat)

qérindashlirim!  kélinglar, mushu mubarek waqitta, bu mubarek ibadetgahimizda qolimizni échip, ulugh perwerdigarimizgha chin dilimizdin yalwurayli: perwerdigarimiz! bigunah insanlarni, anilarni, perzentlerni cheylep ötüp kétiwatqan bu hayasizlarche hujumlarni toxtitip bergin! insaniyetke yiraqni körerlik, eqil – paraset, wijdan we merhemet ata qilghin! bizni qérindashlirimizni untup qélishtin saqlighin! bizni zulum we naheqchilik aldida süküt qilghuchilardin qilmighin! perwerdigarimiz! süriyede we dunyaning oxshash bolmighan jayliridiki qirghinchiliqlarda hayatidin ayrilghan qérindashlirimizgha rehmet qilghin! yarilanghan qérindashlirimizgha téz shipaliqlar ata qilghin! musulman qérindashlirimizgha ular duchar boluwatqan qiyin künlerdin qurtulushi üchün yardem qilghin! insaniyetning wijdan yükini yelkisige alghan éziz millitimizdin yardimingni, inayitingni kem qilghimin, amin!