kapirlar hiyle - neyrengliri bilen peqet tuymastin özlirinila aldaydu

türkiye awazi radiyosi xewiri: beqere sürisi, 5 – 23 - ayetler

ene shular perwerdigarining toghra yolida bolghuchilardur, ene shular bextke érishküchilerdur[5]. shübhisizki, kapirlarni agahlanduramsen, agahlandurmamsen, beribir, ular iman éytmaydu[6]. allah ularning dillirini we qulaqlirini péchetliwetken (imanning nuri kirmeydu), ularning közliri perdilengen (heqiqetni körmeydu), ular (axirette) qattiq azabqa duchar bolidu[7]. kishiler arisida allahqa we axiret künige ishenduq dégüchiler bar, heqiqette ular ishenmeydu (yeni aghzida ishenduq dégini bilen, könglide ishenmeydu)[8]. ular allahni we möminlerni aldimaqchi bolidu, heqiqette ular tuymastin özlirinila aldaydu[9]. ularning dillirida késel (yeni munapiqliq we sheklinish) bar, allah ularning késilini kücheytiwetti؛ yalghan sözligenlikliri (yeni yalghandin imanni dewa qilghanliqliri we allahning ayetlirini mesxire qilghanliqliri) üchün ular qattiq azabqa duchar bolidu[10]. ulargha: «yer yüzide buzghunchiliq qilmanglar» déyilse, «biz islah qilghuchilarmiz» deydu[11]. bilinglarki, ular heqiqeten buzghunchilardur, lékin buni özliri tuymaydu[12]. ulargha (yeni munapiqlargha): «iman éytqan kishilerdek (yeni sahabilerdek chin könglünglar bilen) iman éytinglar» déyilse, «biz iman éytqan exmeqlerge oxshash iman éytamduq?» deydu. bilinglarki, ularning özlirila exmeqler, lékin (buni) ular tuymaydu[13]. ular möminler bilen uchrashqinida: «biz iman éyttuq» déyishidu, shayatunliri (yeni munapiq kattibashliri) bilen yalghuz jayda tépishqanda bolsa: «biz heqiqeten siler bilen billimiz, peqet (tilimizning uchidila iman éytip qoyup) möminlerni mesxire qilimiz» deydu[14]. mesxire qilghanliqliri üchün allah ularni jazalaydu, ularni gumrahliqlirida qoyup bériduki, ular téngirqighan halda yürüshidu[15]. ene shular hidayetni bérip, gumrahliqni aldi. shunga sodisi payda keltürmidi, ular hidayet tapquchi bolmidi[16]. ular goyaki (kéchide issinish we yoruqluq élish üchün) ot yaqqan kishilerge oxshaydu, ot ularning etrapini yorutqanda, allah ularning (otining) yoruqini öchürüwetti, ularni (etrapidiki héch nersini) körelmeydighan qarangghuluqta qaldurdi[17]. ular gastur (yeni gas anglimighandek, yaxshiliqni anglimaydu), gachidur (yeni gacha sözliyelmigendek, yaxshi ishni sözliyelmeydu), kordur (yeni kor bolup qalghandek, toghra yolni körmeydu), shunga ular (gumrahliqtin) qaytmaydu[18]. yaki ular zulmetlik, güldürmamiliq we chaqmaqliq qattiq yamghurda qalghan, goya chaqmaq soquwétip ölüp kétishtin qorqup, qulaqlirini barmaqliri bilen étiwalghan kishilerge oxshaydu. allah kapirlarni (yeni ularning hemme ehwalini) bilip turghuchidur[19]. chaqmaq chaqqanda ular köz nuridin ayrilip qalghili tas qalidu, ular chaqmaq yoruqida méngiwalidu؛ qarangghuluq qaplighanda turup qalidu. allah xalisa idi, ularni anglash we körüsh quwwitidin elwette mehrum qilatti. allah heqiqeten her nersige qadirdur[20]. i insanlar! teqwadarlardin bolushunglar üchün, silerni we silerdin burunqilar (yeni ötkenki ümmetler) ni yaratqan perwerdigaringlargha ibadet qilinglar[21]. allah silerge zéminni töshek we asmanni bina (yeni yultuzlarning zichliqida binagha oxshash) qilip berdi, buluttin yamghur yaghdurup berdi, silerge riziq bolush üchün yamghur arqiliq türlük méwilerni östürüp berdi. emdi allahqa shérik keltürmenglar, halbuki, siler (allahning shériki yoqluqini) bilip turisiler[22]. bendimiz (muhemmed) ge biz nazil qilghan qurandin sheklensenglar, qurangha oxshash birer sürini meydangha chiqirip béqinglar (qurangha teerruz qilishta) allahtin bashqa yardemchinglarning hemmisini (yardemge) chaqiringlar, (quran insanning sözi dégen gépinglarda) rastchil bolsanglar[23].