erdoghan xelqaraliq kaspiy néfit we tebiiy gaz yermenkisining échilishigha télégramma yollidi

türkiye awazi radiyosi xewiri: jumhur reis erdoghan ezerbeyjan paytexti bakuda ötküzülgen 29-nöwetlik xelqaraliq kaspiy néfit we tebiiy gaz yermenkisining échilishigha télégramma  yollidi.

baku énérgiye heptiliki dairiside uyushturulghan barliq paaliyetlerning ijabiy netijilerni qolgha keltürüshini ümid qilidighanliqini tilgha alghan jumhur reis erdoghan, yermenkining türkiye bilen ezerbeyjan otturisidiki hemkarliqning chongqurlishishigha wasite bolushini hemde rayonning tinchliqi we muqimliqigha töhpe qoshushini ümid qilidighanliqini bildürdi.

u türkiye bilen ezerbeyjanning her sahedikige oxshash énérgiye sahesidimu qoyuq munasiwiti barliqini tekitlep: «bizning baku-tiblis-jeyhan, baku-tiblis-erzurum turuba yolliri we tirans anadolu tebiiy gaz turuba yoli qatarliq uzun muddetlik ul-eslihe sélinmilirimiz arqiliq yüksek pellige kötürgen hemkarliqimiz türkiye we ezerbeyjangha paydiliq bolupla qalmay, yene rayon we yawropaning énérgiye bixeterlikigimu zor töhpe qoshti. türkmenistande ishlepchiqirilidighan tebiiy gazning bizning ortaq tirishchanliqimiz bilen türkiye we yawropagha yetküzülüshi hemde trans anadolu tebiiy gaz turuba liniyesining sighimchanliqini ashurush peqetla waqit mesilisi. bizning bu yönilishtiki xizmetlirimizning pat yéqinda méwe bérishi, shübhisizki, türkiye bilen ezerbeyjanning yene bir ortaq muweppeqiyiti bolidu» dégenlerni qeyt qildi.

erdoghan türk dunyasining döletler ara énérgiye, shundaqla siyasiy, iqtisadiy, soda, bixeterlik, herbiy ishlar, mudapie sanaiti, qatnash, sehiye, maarip we medeniyet saheliridiki hemkarliqni téximu ilgiri sürüshini shundaqla téximu chongqurlashturushini xalaydighanliqlirini sözlirige ilawe qildi.