amérika maliye ministiri janét yéllén xitayda ziyarette bolmaqta

türkiye awazi radiyosi xewiri: amérika maliye ministiri janét yéllén xitaydiki ziyaritining birinchi békiti guangjuda amérika soda uyushmisi wekilliri bilen körüshkende söz qilip: «amérika bilen xitay otturisidiki iqtisadiy munasiwet dunyadiki eng muhim ikki tereplik iqtisadiy munasiwet. dunyaning herqaysi jaylirida döletler bizning iqtisadimiznila emes, munasiwitimiznimu yéqindin közetmekte. bu munasiwetni mesuliyetchanliq bilen dawamlashturush kérek» dédi.

yélén xitayda tijaret qiliwatqan amérika shirketlirining üchtin birining xitaydiki riqabetchilirige sélishturghanda adaletsiz muamilige uchrawatqanliqini tekitlep, chet el shirketlirining bazargha kirishidiki tosalghular we amérika shirketlirige qaritilghan mejburlash xaraktérlik heriketlerning bu dölettiki soda muhitigha ziyan salghanliqini éytti.

amérika shirketlirining béyjing hökümitining bazar usulidin künséri yiraqlishiwatqan pozitsiyeliridin endishe qiliwatqanliqini bildürüp: «éhtiyajtin artuq ishlepchiqirish keng kölemlik töwen bahaliq éksportni keltürüp chiqiridu. bu amérika shirketliri we ishchilirining ish ornidin ayrilip qélishini keltürüp chiqiripla qalmay, hindistan, méksika qatarliq döletlerdiki shirketlergimu passip tesir körsitidu» dédi.

u ishlepchiqirish iqtidarining éship kétishining teminlesh zenjirining heddidin ziyade merkezlishishini keltürüp chiqiridighanliqini, buning dunya iqtisadining berdashliq bérish küchige passip tesir körsitidighanliqini sözlirige ilawe qildi.