AidData: «bir belwagh bir yol» türi xitayni dunyadiki eng chong heqdargha aylandurdi
«bir belwagh bir yol» türige awaz qoshqan nurghun döletning xitaygha 1 tirilyon dollardin artuq qerzdar ikenliki otturigha chiqti.
türkiye awazi radiyosi xewiri: xitayning nurghun döletke «bir belwagh bir yol» türi dairiside bergen 1 tirilyon dollardin artuq qerzi, uni dunyadiki eng chong heqdargha aylandurdi.
texminen on yil ilgiri xitay dölet reisi shi jinping teripidin yolgha qoyulghan «bir belbagh bir yol» türige urugwaydin sirilankaghiche bolghan 150 nechche dölet qatnashqan bolup, qurulushning deslepki on yilida, xitay ottura we töwen kirimlik döletlerge köwrük, port we tashyol qurulushlirigha ishlitishi üchün, zor miqdarda qerz tarqatti.
her qaysi hökümet we organlarn meblegh salghan yardem türliri heqqidiki sanliq melumatlarni toplaydighan AidData shirkiti düshenbe küni doklat élan qilip, xitay teminligen mezkur qerzlerning yérimidin köprekining qayturulush basquchigha kirgenlikini otturigha qoydi.
AidData, xitayning 165 dölettiki texminen 21 ming türge yürüshtürgen meblighige alaqidar sanliq melumatlarni tekshürüp, béyjingning ottura we töwen kirimlik döletlerge her yili texminen 80 milyard dollar yardem we qerz wede qiliwatqanliqini bildürdi.
doklatta körsitilishiche, amérika nöwette mezkur döletlerni her yili 60 milyard dollar meblegh bilen teminleydiken.
doklatqa qarighanda, béyjing bergen qerzliri sayisida «dunyadiki eng chong heqdar»igha aylanghan.
AidData, tereqqiy qiliwatqan döletlerning xitaygha töleydighan ösümdin sirtqi omumiy qerzining kem dégende 1 tirilyon 100 milyard dollargha yétidighanliqini otturigha qoydi.
