riyad bilen kuweyt tebiiy gaz sahesi biterep rayoni toghrisida birleshme bayanat élan qildi
kuweyt bilen seudi erebistan pars qoltuqidiki durra tebiiy gazliqini öz ichige alghan «bölüngen biterep rayon»ning yalghuz bu ikki döletningla ortaq mülki ikenlikini uqturdi.
türkiye awazi radiyosi xewiri: kuweyt we seudi erebistan tashqi ishlar ministirliqliri birleshme bayanat élan qilip, mezkur rayonning bayliqini ishlitish hoquqining pütünley ikki döletke tewe ikenlikini tekitlidi؛ bayanatta: «xelqara qanun we yaxshi qoshnidarchiliq munasiwitige mas halda, kuweyt bilen seudi erebistan iranni bölüngen biterep rayonning sherqiy chégrasi toghrisida söhbetlishishke chaqiridu» dégen ibarilerge orun bérildi.
iran néfit ministiri jewad owji 2 – awghusttiki kabinét yighinidin kéyin bayanat élan qilip, özlirining pars qoltuqidiki arash / durra tebiiy gazliqi mesiliside kuweyt bilen hemkarliship heriket qilishqa teyyarliqini kuweyt terepke melum qilghanliqini éytqanidi.
besre qoltuqidiki 1967- yili bayqalghan arash / durra tebiiy gazliqi uzun yillardin buyan iran bilen kuweyt otturisida mesile peyda qilip kelmekte. gazliqning iran tereptiki qismining «arash», kuweyt tereptiki qismining «durra» dep atilidighanliqi melum.
seudi erebistan bilen kuweyt 2022- yili martta durra tebiiy gazliqini échish kélishimi imzalighanidi.
iran bolsa, bu kélishimning «qanunsiz» ikenlikini ilgiri sürüp, rayonda burghilash xizmitini bashlaydighanliqini élan qilghanidi.
bu yil 7- ayning 3- küni kuweyt iranni rayonning déngiz chégrasini békitish toghrisida söhbetlishishke teklip qilghan, téhran hökümiti bu toghriliq héchqandaq bayanat bermigenidi.
kuweyt néfit ministiri seid elbaraq 27- iyul bayanat bérip: «kuweyt iran bilen bolghan chégraning békitilishini saqlap turmastin, durra tebiiy gazliqidiki charlash we ishlepchiqirish paaliyetlirini bashlaydu» dégenidi.
مۇناسىۋەتلىك خەۋەرلەر
türkiyening inawet derijisi östürüldi
xelqara inawet bahalash orgini — S&P türkiyening inawet derijisini «B» din «B +» qa östürdi.
