türk kéngishi sélinma fondi tesis qilish toghrisida téléwiziye yighini chaqirdi

türkiye awazi radiyosi xewiri: ezerbeyjan, qazaqistan, qirghizistan, türkiye we özbéksitan resmiy eza, wingériye közetküchi eza bolghan türk kéngishining eng muhim türlirining biri bolghan sélinma fondini tesis qilish teyyarliq yighinigha munasiwetlik döletlerning iqtisad we maliye ministirliqlirining yuqiri derijilik memurliri qatnashti.

bash katip baghdad amréyéw yighinda söz qilip, sélinma fondining türk dunyasining ijtimaiy we iqtisadiy tereqqiyatigha, türk kéngishi döletliri otturisidiki iqtisadiy munasiwetlerning téximu yuqiri pellige chiqirilishigha shundaqla eza döletler otturisidiki soda hejimlirining ashurulushigha muhim hesse qoshidighan qedemlerning biri ikenlikini éytti.

sélinma fondining yuqumdin kéyinki mezgilde téximu muhim orungha ige bolidighanliqini tilgha alghan amréyéw, türk kéngishining uzun muddetlik iqtisadiy nishanlirining orundilishigha bu fondining muhim küch béghishlaydighanliqini qeyt qildi.

sélinma fondini royapqa chiqirish yolida bésilidighan qedemlerning yol xeritisi  békitilgen yighinda, téz we ünümlük qedemlerning tashlinishi qarar qilindi.

yighinda sélinma fondining nishani, mezmuni, qurulmisi, maliye menbeliri, payda yaritidighan saheliri we bashqa mesililer toghrisidimu pikir birliki hasil qilindi.

türk kéngishi sélinma fondi eza we közetküchi döletlerdiki kichik we ottura hejimlik karxanilarni qollashni nishan qilidu. alaqidar döletlerning aldimizdiki mezgillerde sélinma fondining qurulush höjjitining axirqi nusxisi élan qilishi kütülmekte.