xitayning yük poyizi enqerege yétip keldi

türkiye awazi radiyosi xewiri: türkiye tashqi ishlar ministirliqi xitaydin yawropagha qarap yolgha chiqqan yük poyizining enqerege yétip kelgenliki toghrisida yazma bayanat élan qildi.

bayanatta, shien shehiridin yolgha chiqqan «xitay tömür yol éksprés» (ChinaRailwayExpress) poyizining bügün (6-noyabir) enqerege yétip kelgenliki bildürüldi. bayanatta mundaq déyildi:

«bu tereqqiyat-dölitimiz ijra qilghan sherq bilen gherb otturisidiki baghlinishchanliqni tereqqiy qildurush nishanining yéngi örnikidur.»

bayanatta yene, türkiyening yéqinqi yillarda qatnash asasini tereqqiy qildurush arqiliq asiya bilen yawropa otturisida izchilliqqa ige bir-birige bolghan baghlinishchanliqning tereqqiyatigha chong hessilerni qoshqanliqi tekitlinip: «bu meqsetke eng ünümlük xizmet qilidu, dep qaralghan we hazardin ötidighan sherq-gherb ottura karidori dairiside, rayondiki shériklirimiz bilen birlikte zörür qedemlerni tashlash dawamlishidu» déyildi.

shiendin yolgha chiqqan shundaqla marmara tömür yolidin ötüp yawropagha yétip baridighan tunji yük poyizi, enqere poyiz istansisida murasim bilen kütüwélindi.

murasimgha, qatnash ministiri jahit turhan, soda ministiri ruhsar pekjan, türkiye jumhuriyiti tömür yolliri idarisi bash mudiri eli ihsanuygun, qazaqistan dölet tömür yolliri idarisining bashliqi sawat myinbayéw, ezerbeyjan muawin iqtisad ministiri niyazi seferow, shenshi ölkilik partkomining sékritari xu péng we bashqa munasiwetlik kishiler qatnashti.

türkiye qatnash ministiri jahit turhan shien shehiridin yolgha chiqqan we 42 yük aptomobiligha teng kélidighan éléktironluq mehsulatlarni toshup mangghan poyizning 820 métir uzunluqqa ige ikenlikini, 42 kantéynér barliqini, ikki qite, 10 dölet we ikki déngizdin ötüp, 11 ming 483 kilométir yolni 12 künde basidighanliqini qeyt qildi.

u mezkur layihening döletlerge soda kirimi ata qilishtin bashqa, xelqler otturisidiki munasiwetlerni kücheytidighanliqini, medeniyetler ara tesirchanliqni tézleshtürüshke hesse qoshidighanliqini eskertip, türkiyegiche héchqandaq tosqunluqqa we qiyinchiliqqa uchrimay yétip kelgen poyizning, chéxiye paytexti piragada tarixiy sepirini muweppeqiyetlik axirlashturidighanliqigha ishinidighanliqini bildürdi.

yük poyizi türkiyede ahilkelek, kars, erzurum, erzinjan, siwas, qeyseri, kirikkale, enqere, eskishehir, kojaeli, istanbul (marmaray) we kapikule (edirne) qatarliq jaylardin ötidu.