türkiyening wénézuélagha bolghan éksporti ashti

türkiye awazi radiyosi xewiri: ege éksportchilar birlikining muawin maslashturghuchisi birol jelep, türkiyening wénézuélagha bolghan éksportining éshishigha egiship, ikki dölet otturisidiki siyasiy munasiwetlerning barghanséri mustehkemliniwatqanliqini, jumhur reis rejep tayyip erdoghan bilen wénézuéla  pirézidénti nikolas maduroning özara ziyaretlirining siyasiy we medeniyet jehettiki munasiwetlerning janlinishida muhim rol oynawatqanliqini qeyt qildi.

wénézuélagha 2017 – yili yanwardin noyabirghiche 36.7 milyon dollarliq éksport qilinghanliqini, 2018 – yiligha kelgende bu reqemning aldinqi yilning oxshash mezgilige sélishturghanda % 207 éship, 112.8 milyon dollargha yetkenlikini éytqan jelep, bolupmu yémek - ichmek sahelirining bu döletke bolghan éksportlirining % 182 lik éshish bilen 73.2 milyon dollargha yetkenlikini, amérika qoshma ishtatlirining iqtisadiy émbargoliri sewebidin wénézuélaning néfit bahasida dawalghushluq haletning otturigha chiqqanliqini, buninggha egiship döletning iqtisadiy kirizisni bashtin kechürüwatqanliqini tekitlep mundaq dédi: «siyasiy jehettiki munasiwetlirimizning chongqurlishishigha egiship, éksportimizning barghanséri éshishishni kütüwatimiz.»