tramp yéshil sanaetlerge bérilidighan étibarlarni emeldin qalduridu

türkiye awazi radiyosi xewiri: aqsaray iqtisad kéngishining bashliqi lorriy kudlow pirézidént trmpning tok aptomobillargha qaritilghan étibar bérish siyasetlirini pat arida axirlashturushni pilan qilghanliqini éytti.

u muxbirlargha, amérikaning aptomobil shirkiti jénéral motors (General Motors) dölet ichidiki bezi fabrikilirini taqashni qarar qilghandin kéyin élip bérilghan tekshürüsh we tetqiq qilishlar toghrisida melumat berdi.

u pirézidént trampning sabiq pirézidént barak obamaning tok aptomobillar we bashqa «yéshil» sanaetler üchün bashlighan étibar bérish siyasetlirini emeldin qaldurushni telep qilghanliqini bildürdi. u: «bu xil étibar bérish siaysetlirining hemmisini axirlashturmaqchimiz» dédi.

u peqet jénéral motorsqa bérilgen étibar bérish siyasetlirining toxtitilmaydighanliqini, belki barliq étibar siyasetlirini 2020 yaki 2021-yilida axirlashturushning mumkinlikini bildürdi.

jénéral motors ötken hepte bayanat élan qilip, mishigan ishtatidiki töt, marilend ishtatidiki ikki, oxayo ishtatidiki ikki, kanadaning ontariyo ishtatidiki bir fabrikaning kéler yili (2019) taqilidighanliqini, ishchilar sanining %15 azaytilidighanliqini bildürgen idi.

pirézidént tramp bu heqte toxtilip: «jénéral motors we xojayini mari barra, oxayo, mishigan we marilendiki fabrikalirini taqash bilen méni köp ümidsizlendürdi. méksika bilen xitayda bolsa taqalghan héchnerse yoq. amérika jénéral motorsni qutquzdi we alghan teshekkür jawabimiz bu. emdi tok aptomobillarni öz ichige alghan jénéral motorsqa bérilgen barliq étibarlarni toxtitishni oylishiwatimiz»  dédi.