jungshing amérikada ishlepchiqirish paaliyitini toxtatti

türkiye awazi radiyosi xewiri:xitayning éléktronluq üsküniler we téléfon üsküniliri ishlepchiqiridighan jungshing  shirkiti, amérika yolgha qoyghan cheklimiler sewebidin asasliq ishlepchiqirish paaliyitini toxtatqanliqini élan qildi.

washington hökümiti jungshing shirkitining amérikada ishlepchiqarghan mehsulatlirini qanunsiz yollar bilen irangha ewetip, amérikning éksport émbargolirigha xilapliq qilghanliqi ashkarilanghandin kéyin, amérika shirketlirining 7 yil boyiche jungshinggha zapchas we yumtallarni sétishini chekligen idi.

jungshing shirkitining tünügün (10-may) ki bayanatida mundaq déyildi:

"éksportni cheklesh qarari boyiche, shirket asasliq ishlepchiqirish paaliyitini toxtatti.  hazir shirketning qolida yéterlik neq pul bar bolup, shirket qanun we tüzümlerge boysunghan halda soda ishliridiki mesuliyetlirige qetiy riaye qilmaqta."

jungshing shirkiti xuawéy we nokiyagha oxshash, dunyadiki eng chong téléfon üsküniliri ishlepchiqridighan shirketlerning biri.

jungshing shirkiti maliye ministirliqigha cheklimilerning emeldin qaldurulushini telep qilip iltimas sunghanliqinimu bildürdi. bu heqte mundaq déyildi:

"amérika hökümiti teripidin yolghan qoyulghan éksport cheklimisining özgertilishini yaki buning del eksiche bolushi we mesililerning hel qilinishida ijabiy netije élish meqsitide amérika hökümiti bilen aktip alaqe qilish dawamlishiwatidu."

jungshing shirkiti türkiyedimu paaliyet körsitiwatqan bolup, netash (Netaş) shirkitining %48 pay chékige ige.

jungshing shirkitining teminlesh zenjirini üzüwétishni mezmun qilghan cheklime, amérika-xitay soda urushi éhtimalliqigha munasiwetlik ixtilaplar ulghayghan bir waqitqa toghra keldi.

xitay hökümiti ötken hepte béyjingni ziyaret qilghan amérika soda heyiti bilen bolghan uchrishishlarda, jungshing shirkiti mesilisini küntertipke qoyghan idi.